Meeqqat kinguaassiuutitigut atornerlunneqartarnertik pillugu atisanik, aningaasanik imigassanillu aalakoornartortalinnik tunineqartarput
Meeqqat killissatik qaangertittarpaat imigassamillu, cigarettinik, atisanik aningaasanillu pissarsisarlutik. Inatsisartunut ilaasortamut akissummini Meeqqanut Inuusuttunullu Naalakkersuisoq taamatut paasissutissiivoq.
Qeqqata Kommuniani isumaginnittoqarfimmi upalungaarsimanissamut pilersaarusiaq aallartinneqarpoq, meeqqat inuusuttullu kinguaassiuutitigut atornerlunneqartartut kingornalu akilerneqartartut paasineqarmat.
Inatsisartunut ilaasortamut Doris J. Jensenimut (S) paragraf 37 naapertorlugu akissummini Meeqqanut Inuusuttunullu Naalakkersuisoq, Aqqaluaq B. Egede (IA) taamatut paasissutissiivoq.
Taamaattorli Meeqqanut Inuusuttunullu Naalakkersuisup meeqqat atortittartutut taanissaat nangaassutigaa, soorlu meeqqanik sullissisunut angalasartut ukiut marluk matuma siorna Sisimiunut angalanerannit nalunaarusiami tamanna takuneqarsinnaasoq:
- lsumaginninnermut Aqutsisoqarfiup katsorsaanissamik neqeroorutaa, meeqqanik katsorsaasut angalasartoqatigiit illoqarfinni assigiinngitsuni arlalinni suliniuteqarnermikkut meeqqat inuusuttullu atugarliortut ilai, ilaatigut imigassat aalakoornartortallit, cigaretit, atisat aningaasallu pillugit timimikkut tarnimikkullu imminnut killissaminnik qaangiisarnerannut tunngatillugu pisoqartarneranik ilisimasaqalersimapput.
- Meeqqat atugarliortut sunnertiasullu pissusilersornerat akilersilluni atoqateqarnertut taassallugu pissusissamisoornanilu eqqortuunngilaq, Aqqaluaq B. Egede paragraf 37 naapertorlugu apeqqummut taamatut akissuteqarpoq.
Kommune suliat ilisimasaqarfigisimanngikkaat
Qeqqata Kommuniata Sermitsiaq.AG-mut erseqqissareerpaa oqartussaasunik allanik suleqateqarnertik ingerlalluartoq, aamma meeqqat inuusuttullu pillugit naalakkersuisoq taama oqarpoq.
Aammattaaq naalakkersuisoq ilisimatitsivoq kommuni pinaveersaartitsinermik iliuuseqartoq:
- Kinguaassiutitigut kannguttaatsuliortarnernik atornerluisarnernilluunniit nalunaarutiginnittoqartarnissamut Qeqqata Kommunia ajornartoornermi upalungaarsimanissamut pilersaarusiorsimavoq, tassani pisoqarsimatillugu akuliussimasut tamarmik, matumani atuarfik, ulluunerani paaqqinnittarfiit peqqinnissaqarfillu aggersarneqartarput, tamatumalu kingorna politiinut nalunaarummik tunniussisoqartarluni, Aqqaluaq B. Egede ilisimatitsivoq.
Sulisut sulianik assingusunik ilisimasaqarsimagaluarlutik iliuuseqarsimanngitsut qanoq pineqassanersut Doris J. Jensenip apeqqutigaa. Qeqqata Kommuniani sulisut suliat taakku siornatigut ilisimasimanngikkaat Naalakkersuisoq erseqqissaavoq:
- Inatsit malittarisassallu malinnagit sulisoqarnerminik ilisimasaqarani Qeqqata Kommunia ilisimatitsivoq. Sulisunut malittarisassat naapertorlugit sulisoq pisussaaffimminik sumiginnaappat siullermik mianersoqqusisoqartassasoq kommunp ilassutigaa.