Meeqqat pillugit Siunnersuisoqatigiit nutaat Naalakkersuisunit toqqarneqartut
Naalakkersuisut meeqqat pillugit siunnersuisoqatigiinni ilaasortassanik nutaanik toqqaapput. Siunnersuisoqatigiit MIO siunnersortassavaat. Ilaasortaq ataaseq ingerlaqqittoq, tallimat nutaat ilaasortanngorput.
Meeqqat pillugit Siunnersuisoqatigiit, meeqqat illersuisuannik periusissialiornerni siunnersuisartussat, nutaanik ilaasortaqalerpoq.
Dina Berthelsen ukiuni pingasuni tullerni ilaasortatut ingerlaqqittoq, ilaasortat sinneri tallimat tamarmik nutaajupput.
Namminersorlutik Oqartussat tusagassiorfinnut nalunaarutiminni ilisimatitsissutigaat siunnersuisoqatigiit meeqqat pisinnaatitaaffiinik nukittorsaanissamut suliaqassasut.
- Ukiuni aggersuni Meeqqat pillugit Siunnersoqatigiinnik piginnaaneqarluartunik tunniusimasunillu toqqaasinnaagatta assut nuannaarutigaara. Ukiuni kingulliunerusuni meeqqat pisinnaatitaaffii pimoorussamik ullormut oqaluuserisassanngorsimapput, tamatumunnga ilaatigut qujanartumik MIO-p aamma Meeqat pillugit Siunnersuisoqatigiit sulinerisa kinguneraat. Taamatut sulineq ingerlaannassaaq, meeqqanut, inuusuttunut ilaqutariinnullu Naalakkersuisoq Paneeraq Olsen oqarpoq.
Ilaasortat nutaat
Meeqqat illersuisuat atorfimminut atatillugu siunnersuisoqatigiinni siulittaasutut inissisimavoq.
Siunnersuisoqatigiit ukuulerput:
- Rikke Frederiksen, Sociologi-mi MSc
- Julie Lynge, Peqatigiiffimmi Kalaallit meerartaat Allattoqarfiani aqutsisoq
- Erni Kristiansen, Ilinniartitsisutut ilinniarsimasoq KRK-INUA-milu suliniummut aqutsisoq (Røde Korsimi Inuusuttunut immikkoortortaq)
- Dina Berthelsen, peqqissaasuni aqutsisoq
- Lars Fleischer, Ilinniartitsisutut ilinniarsimasoq, Avannaata Kommuniani Atuarfimmi siunnersorti
- Nuka Fleischer, Mælkebøttecenterimi Piginnaasanik ineriartortitsinermullu pisortaq
- Ukiuni pingasuni tullinnguuttuni MIO meeqqat atugaannik immikkut qitiutitsilluni nakkutiginnissaaq, tassunga ilanngullugu meeqqat atugaat pillugit ilisimasaqarnerulerneq. Tamatuma saniatigut imminut toquttarnerup pitsaaliorneranik kiisalu ilaqutariinnik ukkatarinnissaagut. Taamaammat Meeqqat pillugit Siunnersuisoqatigiit nutaat suleqatigilernissaanut qilanaarpunga, Meeqqat Illersuisuat Aviâja Egede Lynge oqarpoq.