Meeqqat tamarmik paaqqinnittarfinni inissarsisinneqarput
- Meeqqat 20-t, "Tûgdlik"-miissimasut, tamarmik kommunimi angerlarsimaffimminni paaqqinnittarfinni inissarsisinneqarput, Mimi Karlsen oqaluttuarpoq
Amerlasuunut tupaallaataasimavoq naalakkersuisut ullualunnguanik piffissaliillutik "Tûgdlik" matummassuk - imaluunniit eqqornerusumik oqaatigalugu, naalakkersuisut aalajangersimammata ulloq unnuarlu paaqqinnittarfiup, umiartornermik ilinniarfiup Nuummiittup "Tûgdlik"-ip imminut pigisutut ingerlannissaanut akuersissut maajip aallaqqaataanit atorunnaartimmassuk.
Namminersorlutik Oqartussanit tusagassiorfinnut nalunaarut naatsoq malillugu tamatumunnga pissutaavoq misissuinermi »pissutsit ernumanartoqartorujussuit" paasineqarsimammata.
Sermitsiaq.AG- aatsaat marlunngormat unnukkut politikkikkut akisussaasoq Mimi Karlsen pissarsiaraa.
- Naalakkersuisut oqaramik "pissutsit ernumanartoqartorujussuusut" qanoq isumaqarpat?
- Nakkutilliinissatsinnut pisussaaffeqarpugut, "Tûgdlik"-mili pissutsit pillugit immikkuualuttunik oqaaseqaqqusaanngilanga, paasissutissat isertuussaammata.
- Erseqqissarusupparali meeqqat 20-t tamarmik "Tûgdlik"-miissimasut angerlarsimaffittut kommuniminni paaqqinnittarfinni nutaamik inissarsisinneqarsimammata - inuinnaat angerlarsimaffiini paaqqinnittarfinniluunniit.
- Tamatumunnga ilaatigut pissutaavoq Sisimiuni immikkut paaqqinnittarfimmi immikkoortoqarfik Qasapermiut, Mimi Karlsen, ilaqutariinnermut, kulturimut, ilageeqarnermut naligiissitaanermullu naalakkersuisoq, Inuit Ataqatigiit, nassuiaavoq.
Ulloq unnuarlu paaqqinnittarfik imminut pigisoq, umiartornermik ilinniarfik "Tûgdlik" meeqqanut inuusuttunullu artornartunik atugalinnut 14 aamma 18 akornanni ukiulinnut atuussimavoq.