Meeqqat ulluat malunnartillugu MIO musikvideomik saqqummersitsivoq
Musikvideo nutaaq, Paarissavatsigit/Vi passer på dig, meeqqat ulluannut, 1. junimut atatillugu MIO-p saqqummersippaa.
Inersimasut meeqqap qanigisai inuiaqatigiillu tassaapput meeqqamut akisussaasut meeqqamillu paarsisussat.
Musikvideomi nutaami, Meeqqat pisinnaatitaaffiinik sullissiviup MIO-p 1. juni, meeqqat ulluani saqqummersinneqartumi tamanna oqariartuutigineqarpoq.
MIO tusagassiorfinnut nalunaaruteqarluni allappoq.
Erinarsuut meeqqat, angajoqqaat aanaakkullu oqariartuutaat aallaavigalugit allataavoq. Oqariartuutit MIO-p angalasarnermini katersorsimavai.
- Uagut meeqqat inuusuttullu kissaataat pillugit tusarnaarlugit oqaloqatigisimavagut. Meeqqat inuusuttullu ataatsimoornermik, qanilaarnermik toqqissisimanermillu kissaateqarput. Nipilersuutip nalunaarutaa tassaavoq, inersimasuusugut ataatsimoorluta suleqatigiittariaqartugut meeqqat kissaataat tassaasoq ataatsimoorluta paarissagivut, iluatsissappat, meeqqat illersuisuat Aviâja Egede Lynge oqarpoq.
Ilaqutariinneq pitsaasoq
Nipilersorluni videoliami aamma MIO`p iliuusissaminnik pilersaarutai ukiunut tullinnguuttunut pingasunut naqissusiivoq. Meeqqat pisinnaatitaaffii pillugit suliniuteqarfik ukiuni tullinnguuttuni kissaatigaa ilaqutariinnut immikkut ittumik ukkatarinninniarluni.
- Meeqqat Ulluat erinarsuullu eqqaasippaatigut, meeqqat tamarmik pisinnaatitaaffigimmassuk meeqqatut inuunerissaassallutik – ullut tamaasa. Inersimasut akisussaaffigivaat isumagissallugu meeqqat tamarmiusut isumassorneqarluarlutik peroriartussasut, toqqissisimasumik asanninnertalimmillu, Aviâja Egede Lynge oqarpoq.
Paarissavatsigit/Vi passer på dig Nukannguaq Geislerimit taalliarineqarpoq. Siiva Fleischer aamma Nuummi nipilersornermik ilinniarfiup niviarsiarartai erinarsortuupput, MIO-p erinarsoqatigiivi Hans Jukku Noahsen aamma peqataallutik. Anders Berthelsen musikvideomik suliarinnittuuvoq.