Meeqqeriviit pitsaanerusut: App, utoqqaat paarlatsillu siunnersuutigineqarput
Meeqqeriviit qanoq pitsanngorsarneqarnissaannut tunngatillugu innuttaasut arlalinnik siunnersuuteqarput, siunnersuutillu Kommuneqarfik Sermersuumi nalilersorneqarput.
Attaveqarneq pitsaanerusoq, paarlatsinik aalajangersimasunik peqalernissaq, app-imik atuilerneq soraarnerussutisiaqalersunillu sulilersitsineq.
Kommuneqarfik Sermersuup meeqqeriveqarnerup iluani pitsanngorsaanissamut siunnersuutinik septemberimi oktoberimilu noqqaassuteqarmat, innuttaasut ilaat taama siunnersuuteqarput.
Kommuneqarfik Sermersooq pingaartumik Nuummi meeqqerivinni 2022-mi sulisussaaleqingaatsiarsimavoq. Meeraaqqerivimmut aalajangersimasumut meeqqat utaqqisutut allatsinnissaat kommunip piffissap ilaani uninngatittariaqarsimavaa, sulisussaaleqineq pissutigalugu.
Kommunip innuttaasut aaqqiissutissanik siunnersuuteqarpata, tusarumallugit aalajangersimavoq.
App, utoqqaat paarlatsillu
Arlaleriarluni siunnersuutigineqartoq tassaavoq paarlatsinik aalajangersimasunik peqalertoqarnissaa. Paarlatsitut sulisut pisariaqartitsisunut ullaakkut suliartortassapput.
- Sulisutigut amigaateqarneq kommunip misissorsinnaavaa, paarlatsinillu aalajangersimasunik atorfinitsitsilluni. Soorlu paarlattaatitsisartunik pilersitsinikkut, meeqqerivinnik arlalinnik sulissisussamik, siunnersuutigineqarpoq.
Allap siunnersuutigaa innuttaasut soraarninngorsimasut sulili sulerusuttut, meeqqerivimmi sulisunut ikiuuttussatut piffissap ilaani sulilersinneqarsinnaasut.
Siunnersuut alla app-iliornissamik siunnersuutaavoq, angajoqqaat sulisullu pitsaanerusumik attaveqatigiilernissaat anguniarlugu:
- Perorsaasoq sapaatit akunneri tamaasa nalunaarusiorsinnaassaaq meeqqat sulerisimaneri pillugit, sapaatip akunneratalu tulliani pilersaarutit pillugit. Sammisaqartitsinerni assigiinngitsuni atisat suut atorneqarnissaannut tulluunnersut aamma app-imi ilisimatitsissutigineqarsinnaavoq.
Siunnersuuteqartut ilanngullugu nassuiaatigaa app atorlugu meeqqat napparsimasut nalunaarutigineqarsinnaasut, paarlatsinillu sulisoqarpat aamma app-ikkut ilisimatitsissutigineqarsinnaasut.
Kommuneqarfik Sermersuup siunnersuutit maanna nalilersorpai.