Meeraq nukangasoq aqqusinermi aportissimasoq aallarunneqarpoq
Meeraq nukangasoq Tasiilami pingasunngornermi aportippoq. Meeraq Tasiilamit maanna aallarunneqarsimavoq, politiillu suliaq maanna paasiniaaffigaat.
OBS: Allaaserisaq naqqinneqarpoq. Meeraq Islandimut aallarunneqarsimavoq. Allaaserisami siullermik allaqqagaluarpoq meeraq Nuummut aallarunneqarsimasoq.
Meeraq marlunnik ukiulik Tasiilami aqqusinermi ajutoortoqarnerani aportissimavoq.
Sermitsiaq.AG-p paasissutissaatai naapertorlugit sulilluni ingerlatsissutit apuisuusimapput, meerarlu aporneqartoq Islandimut napparsimmavimmut aallarunneqarsimalluni.
Tasiilami politikommissæriugallartup, Aqqalu Petersenip, Sermitsiaq.AG-mut uppernarsarpaa aqqusinermi ajutoortoqarnerani meeraq aportissimasoq. Ilisimatitsissutiginngilaali apuisut suunersut.
- Uppernarsarsinnaavara meeraq marlunnik ukiulik Tasiilami aqqusinermi ajutoortoqarnerani ippassaq aportissimasoq, illoqarfimmullu annerusumut napparsimmavianut aallarunneqartariaqarsimalluni. Annerusumik oqaaseqarsinnaanngilanga, politikommissæriugallartoq Aqqalu Petersen oqarpoq.
- Meeraq maanna Islandimiippoq. Danmarkimut kingorna pillorissaasuni sungiusartinneqartussaassaaq, Aqqalu Petersen oqarpoq.
Takunnissimasut oqaloqatigineqassapput
Aqqalu Petersen ilisimatitsivoq meeraq illoqarfimmut allamut napparsimmavianut aallarunneqartussanngornermini, pissutsit atuuttut naapertorlugit ajorsimanngitsoq.
Tasiilami aqqusinermi ajutoortoqarnera politiinut pingasunngornermi nal. 11.54 nalunaarutigineqarpoq.
Tasiilami innuttaasut takunnissimasut suliami paasiniaanermi oqaloqatigineqartussaapput.
Politiit ilisimatitsipput takunnissimasut tamarmik politiinut namminneerlutik saaffiginnereersimasut.