Meerartaarsinnaanngitsut ikiorserneqassanngillat: Aningaasat peqqinnissamut isumaqatigiissummut nuunneqartut
Meerartaarsinnaanngitsut peqqinnissaqarfimmili ikiorneqarlutik aatsaat meerartaarsinnaasunut aningaasaliissutissat aningaasanut inatsimmut ilaatinneqartussatut neriorsuutigineqaraluarput. Taamaattoqanngilarli. Aningaasat allanut atugassanngorlugit nuunneqarput, Naalakkersuisoq nassuiaavoq.
Naak neriorsuisoqareeraluartoq, aningaasat 8,7 milliuunit koruunit meerartaarsinnaanngitsut peqqinnissaqarfimmi ikiorserneqarnissaannut aningaasanut inatsimmi 2024-mut inissinneqarsimanngillat.
Peqqissutsimut Naalakkersuisup, Agathe Fontainip (IA) Demokraatineersumut Bjørk Lange Olsenimut paragraf 37 atorlugu apeqqutaanut akissummi tamanna allassimavoq.
Aningaasat peqqissutsimut tunngatillugu isumaqatigiissummut "aningaasalersuinissamut illikartinneqarsimasut", akissummi nassuiaatigineqarpoq.
- Peqqinnissaqarfiup maannakkut kissaatiginngisamik meerartaarsinnaanngitsunut neqeroorutaa taamaaginnassaaq, Peqqissutsimut Naalakkersuisoq allakkatigut akissuteqarpoq.
Neqeroorutigineqartut suli killeqarput
Kissaatiginngisamik meerartaarsinnaanngitsut Danmarkimut angalatinneqarnissaat, najugaqartinneqarnissaat napparsimmavimmilu passunneqarnissaannut aningaasaliissuteqartoqarnissaannut siunnersuut ukiuni arlalinni ingerlanneqarsimavoq. Neqeroorut Naalakkersuisut 2018-imi unitsippaat. Suliap nangeqqillugu atulersinneqarnissaa Sermitsiaq.AG-mit ukiuni arlalinni qulaajarneqartarsimavoq. Naalakkersuisut august 2023-mi nalunaaruteqarput, kissaatiginngisamik meerartaarsinnaanngitsunut nakorsiartitsisarnissamut ukiumut aningaasat 8,7 milliuunit koruunit, aningaasanut inatsit 2024-moortoq aallarnerfigalugu, atorneqartalissasut.
Augustimi aningaasanut naalakkersuisuusup Naaja Nathanielsenip (IA) augustimi ilisimatitsissutigaa Inatsisartut kissataat suliniummi malinneqartoq.
Aninngaasalli neriorsuutigisatut illikartinneqanngillat, peqqissutsimulli tunngatillugu isumaqatigiissummut atortinneqalerlutik.
Peqqissutsimut naalakkersuisoq, Agathe Fontain ilisimatitsivoq aningaasat allatut atortussanngorlugit illikartinneqarnerat, aningaasanut inatsisip pingajussaaneerneqarnerani allannguutitut ilaatillugu akuerineqarsimasoq.
- Allannguutissatut siunnersuut nr. 135, aningaasanut inatsisissatut siunnersuutip pingajussaaneerneqarneranit akuerineqartoq innersuussutigineqarpoq, Agathe Fontain akissummini allappoq.