nassitsisarneq
Mellembølge mobilimik taarserneqarsinnaavoq
Mellembølge atorlugu KNR-radiomik tusarnaarsinnaanerup taartigisinnaasa Tele-Postip misilerarniarpaa
2014-ip ingerlanerani Tele-Postip misilerarniarpaa mobil atorlugu KNR-radiop asimi tusarnaarsinnaanissaa. Periarfissaq taanna siunissami atortuulissanersoq isummerfigineqarumaarpoq misileraaneq naammassippat. Piniartut savaatillillu suliniummi akuutinneqassapput.
Atuaruk: Mellembølge aamma kortbølge matussapput
Mellembølge atorlugu KNR-radiop naalaarneqarsinnaanera asimi atorneqartarotq 2011-mi matuneqarpoq. Mellembølgekkut nassitsisinnaanermi periuseq pisoqalisimavoq ingerlatsinerinnarmullu ukiumut 3,1 millioner koruuninik aningaasartuutaasarluni aningaasartuutillu amerliartuinnarnissaat ilimagineqarpoq periuseq taanna atuinnassappat.
Periarfissat arlallit
Radiomilli taamatut naalaarsinnaaneq amerlasuunit maqaasineqarpoq umiatsiamik asimut angalasut silassamik naalaarnermut taanna atortarmassuk. Maannalu periarfissaq kaasarfimmiorineqarsinnaasoq misiligarniarneqalerpoq mobili atorlugu 3G-mik attaveqarsinnaaneq piukunnarnerpaatut toqqarneqarmat. Periarfissat allat tassaapput mellembølgep ammaqqinnissaa imaluunniit FM atorlugu aaqqiinissaq, peqqissutsimut attaveqarnermullu naalakkersuisoq Steen Lynge Atassummeersoq oqarpoq Siumut sinnerlugu Inatsisartuni ilaasortap Ruth Heilmannip paragraf 37 naapertorlugu apeqquteqaataanut akissuteqarluni. Taanna apeqquteqarpoq mellembølgep atuleqqinnissaanut naalakkersuisut suliniutaat sumut killinnersut.
- 3G atorlugu periarfissap misiligarnissaanut pilersaarut Tele-Postip aasarnissaanut piariissavaa. Pilersaarutip imarissavaa misissuinissaq mobilimik 3G atorlugu KNR-radiop tusaaneqarsinnaalernissaa periarfissaanersoq pitsaasoq, Steen Lynge allappoq.
Ukiamut Tele-Post isummerumaarpoq 3G-mik periarfissaq sineriammut annertunerusumut periarfissiissutigineqassanersoq 3G aaqqiissutissatut piukkunnarsorineqassappat.
Steen Lyngep pitsaaqutit ilaattut saqqummiuppaa atuisut radioaviisit kingullit silassallu 3G atorlugu aasinnaalissammatigit taamalu aallakaatitsiffiit aalajangersimasut apeqqutaatittariaqassanagit.