Mentor Immanuel: Nunatta politikerii iliuuseqartariaqarput

Kalaallit meeqqat Danmarkimi angerlarsimaffiup avataanut inissinneqarsimasut angajoqqaaminnut uterteqqinneqarnissaannut Naalakkersuisut suliniartariaqalerput. Mentor Immanuel taama isumaqarpoq.

- Angajoqqaat pisinnaasaannik misissuutitut atorneqartup kalaallinut tulluartuunnginnera paasineqareerpoq. Angajoqqaalli meeqqaminnik arsaagaasimasut meeqqatit suli tigusimanngilaat. Naalakkersuisut akuliuttariaqalerput, Mentor Immanuelimi siulittaasoq Karen Banke Petersen marlunngornermi akerliussutsimik takutitsisoqareersorlu oqarpoq.

Danskit isumaginninnermut ministeriat Pernille Rosenkrantz-Theil (Soc.) ilisimatitsereerpoq angajoqqaat pisinnaasaannik misissuutit kalaallisuunngortinnissaannut ukiut marluk atorneqartariaqartut. Aalajangeriikkalli nalilersorneqaqqissanngillat.

- Meeqqat kalaallit 400-t missaat Danmarkimi angerlarsimaffiup avataanut inissinneqarsimapput. Naalakkersuisut tamanna soqutigisarisariaqarpaat. Taamaattumik akerliussutsimik takutitsivugut. Politikerit oqaasii tusaasakka iluarisimaarpakka, ataqqinninnerali piumaarpaat oqaatsitik malillugit iliuuseqarunik aatsaat, Karen Banke Petersen oqarpoq.

Suna tamarmi politikkiuvoq

"Meeqqagut utertissigit" oqariartuutigalugu akerliussutsimik takutitsisoqarmat innuttaasut 30-t missaat peqataapput.

Mentor Immanuel Nuummiinnermini innuttaasunik aamma ataatsimiisitsivoq, tassani inuit 50-t missaat peqataallutik. Katuami ataatsimiisitsinermut Siumut aningaasaliisuuvoq. Mentor Immanuelimili siulittaasup erseqqissarpaa oqariartuutit politikerinit sunnerneqarsimanatik innuttaasunik ataatsimiisitsisoqartoq.

Mentor Immanuel Danmarkimi kalaallit oqartussanut attaveqarnerannut ikiortitut ukiuni arlalinni sulisimavoq. Meeqqat Danmarkimi najugaqartut, angerlarsimaffiup avataanut inissinneqartarnerat pillugu ukiuni kingullerni annertuumik suliniuteqarpoq.

- Ukiuni arlalinni nipaannerusumik suligaluarpugut. Ajornartorsiulli maanna ersarissumik tikkuarparput, oqaaseqanngikkuttami ajornartorsiut taannaajuaannaavissaaq. Suna tamarmi politikkiuvoq. Uagut peqatigiiffittut politikerit tikkuuppagut, politikerit taakkuupput pitsaanerusumut suliaqartussat, Mentor Immanuelimi siulittaasoq nassuiaavoq.

Taassuma erseqqissarpaa naalagaaffiit meeqqanik angerlartitsisareersut. Assersuutigalugu meeqqat Syriamukartinneqarsimasut danskisut innuttaassuseqarmata Danmarkimut utertinneqarsimasut.

Immikkoortortaq pilersinneqartoq

- Kalaallit Danmarkimiittut ikinnerussuteqartutut illersorneqartariaqarput, nunatsinnilu politikerit tamassumunnga aamma eqeersimaarnerusaeriaqarput. Imaanngilaq kalaallit nuussimammata maani politikerinit puigorneqaannassasut, Karen Banke Petersen naggasiivoq.

Mentor Immanuel Nuummi immikkoortortamik aamma pilersitseqqammerpoq. Immikkoortortaq innuttaasut oqartussannut attaveqarnerannik aamma sullississaaq.