Mette Frederiksen suleqatigiinneq pillugu: Pitsaanerulertuaannarsinnaavugut
Múte B.Egedep Danmarkimi naalakkersuisut sillimaniarnermut politikki pillugu nunami isumaqatigiissutissarsinissaq pillugu nalunaaruteqartoqannginnerani Kalaallit Nunaata akuutitsisimannginnerat pillugu sapaatip akunnerani kingullermi isornartorsiorpai.
Naalakkersuisut siulittaasuata Ministeriunerup Kalaallit Nunaannut tikeraarnissaa sioqqullugu, Danmarkimi naalakkersuisut politikkikkut suliani arlalinni Kalaallit Nunaata akuutinneqarsimannginnera aamma attaveqartarnermut ataatsimiititaliami pilersinneqaqqammersumi siunertarineqartup malinneqarsimannginnera uparuarlugillu isornartorsiorsimavai.
Danskit naalakkersuisuisa Danmarkip 2030-mi illersornissamut aningaasartuutinut naalagaaffimmi tunisat ataatsimut nalingisa to procentiinik Nato-p anguniagaa malillugu atuisalernissaa nalunaarutigimmassuk isornartorsiuisoqarpoq. Socialdemokrattit, Venstre, De Konservative, De Radikale SF-ilu Ruslandi Ukrainemik saassussimmat isumaqatigiissuteqarsimapput.
Mette Frederiksenip marlunngornermi Nuummi tusagassiortunik katersortitsisoqarmat isornartorsiut akissuteqarfigaa
- Qanimut oqaloqatigiittarpugut, sulili pitsaanerusumik oqaloqatigiissinnaanermut sungiusartuartariaqarpugut. Nunanut allanut sillimaniarnermullu politikkimi Kalaallit Nunaata Danmarkillu qanimut suleqatigiilernerat nutaajuvoq, taamaammat aqqutaani kukkusoqarlunilu aporfeqartoqarsinnaavoq, taakkulu suli pitsaanerusumik iliuuseqarfigisinnaasariaqarpavut.
Pineqartut ilaat Danmarkiinnarmut attuumassuteqartut
Illersornissamut aningaasaliissutit amerlineqarnissaat pillugit nunami isumaqatigiissuteqarnermut ministeriuneq erseqqissumik akissuteqarpoq.
- Danmarkimi isumaqatigiissut pineqarpoq. Danmarkimi missingersuutinut inatsisip allanngortinneqarnera aamma illersornissamut atatillugu nangaassuteqarnerup atorunnaarsinneqarnera Danmarkimut tunngassuteqarluinnarput.
Ministeriunerup erseqqissaassutigaa, suliaq ingerlateqqinneqarpat Kalaallit Nunaat akuutinneqassasoq.
- Soorunami illersornissaq pillugu isumaqatigiissuteqarnissaq oqaluuserilerutsigut naalagaaffeqatigiinnut tamanut sunniuteqarsinnaavoq, tassungalu atatillugu attaveqartarnermut ataatsimiititaliamik pilersitsinikkut nukittuumik ingerlatsiveqalerpugut, ministeriuneq oqarpoq.
Suliaq alla isorineqarsimasoq tassaavoq, Issittumi piginnaasanik annertusaanissamut 1,5 milliarder koruuninik aningaasaliissuteqarnissaq pillugu siorna aalajangiisoqarsimanera.
Piginnaasanik annertusaanissaq pillugu aamma isumaqatigiittoqassasoq
Danmarkimit nalunaarutigineqarsimasoq tassaavoq, isumaqatigiissuteqarnikkut Issittumi Atlantikullu avannaanni Illersornissaqarfiup nukittorsarneqarnissaa, tassa teknologiit nutaaliaanerpaat atorlugit nakkutilliisoqartarnissaa anguniarlugu kiisalu naalagaaffeqatigiinnut tamanut iluaqutaasussamik Kalaallit Nunaanni illersornissamut ilinniartitsisoqarnerulernissaa. Taamanikkulli nunanut allanut naalakkersuisuusup Pele Brobergip (N) tamanna nuannarivallaanngilaa.
Pele Brobergip taamanikkut erseqqissaassutigaa, droninut. nunami illersornissamut ilinniartitsinissamut imaluunniit danskit sakkutuuisa nunami maaniinnissaannik Kalaallit Nunaat soqutiginnippallaanngitsoq.
Marlunngornermi tusagassiortunik katersortitsisoqarmat aamma apeqqutigineqarpoq, illersornissamut piginnaasanillu qaffassaanissamut atatillugit Danmarki Kalaallillu Nunaat isumaqatigiissinnaanersut. Ministeriunerup tassunga atatillugu oqaatigaa, Ukrainermi sorsuttoqarnerata pissutsit allanngortilluinnarsimagai.
Silarsuaq ullumikkut allaasoq
- Nunarsuup immikkoortortaani nunagitsatsinni sorsuttoqalinnginnerani illersornissaq pillugu isumaqatigiissuteqarneq aamma issittumi ilassutitut isumaqatigiissuteqarneq assigiissuteqarput, maannalu inissisimaffigisatsinni silarsuaq allatut isilerluta isigisariaqarparput. Illersornissamut isumaqatigiissuteqarnissamut tunngaviuvoq sillimaniarnermut politikkip allatut nalilersorneqarsimanera.
Ministeriunerup Múte B. Egedellu oqaloqatigiittarnissaq isumalluarfigalukku oqaatigaaat.
- Soorunami suut annertusarneqartussatut piukkunnarnerunersut isumaqatigiinngissutaasinnaapput, taamanikkussamulli naapeqatigiissinnaanerput isumalluarfigilluarpara, Mette Frederiksen naggasiivoq.
- Oqaloqatigiinnerup ajunngitsumik ingerlavoq, Kalaallillu Nunaanni Inatsisartut akuersaarsinnaasaannik aaqqiissutissarsissaagut, Múte B. Egede oqarpoq.