Mimi Karlsen: Ataatsimiititaliarsuarmut aningaasatigut siunnersuineq annikippallaarsimavoq
Peqqinnissaq pillugu ataatsimiititaliarsuaq coronap tuniluunnerata nalaani aningaasaqarnerup aqunneqarnissaanut naammaginartumik tapersersorneqarsimanngilaq, Peqqissutsimut Naalakkersuisoq, sakkortuumik isornartorsiuisoqareersorlu taama oqarpoq.
Peqqinnissaq pillugu ataatsimiititaliarsuarmut Naalakkersuisut aningaasanik atuivallaarsimanerat, Inatsisartut Aningaasaqarnermut Akileraartarnermullu ataatsimiititaliaata ”assorsuaq isumakulunnartutut” oqaatigaa, tassungalu atatillugu Inatsisartunit aningaasaliissuteqartoqanngitsoq atuisoqarsimavoq.
Ataatsimiititaliarsuaq aningaasanut inatsimmi immikkoortinneqarsimasunit amerlanerusunik atugaqarsimasoq, Peqqissutsimut naalakkersuisoq Mimi Karlsen (IA), Sermitsiaq.AG-mut ilisimatitsivoq, aningaasartuutit amerlanerunissaat paasinarsimmat, Aningaasanut Akileraartarnermullu Ataatsimiititaliamullu aningaasaliissutit amerlineqarnissaannut qinnuteqartoqarsimanerarpaa.
Ataatsimiititaliarsuarmut isumaliutissiissummik siorna maajimi tunniussisumut aningaasanik saniatigut 1,1 mio. kr.-nit missaanniittunik qinnuiginnittariaqarsimavoq.
Tamanna tunuliaqutigalugu Naalakkersuisut aningaasanik aqutsinermik sukaterinissaannik Aningaasaqarnermut Akileraartarnermullu Ataatsimiititaliaq kaammattuivoq. Aqutsinerli akisussaaffeqartumik ingerlanneqartoq, naalakkersuisoq isumaqarpoq, ataatsimiititaliarsuarmilli siunnersuineq pitsaasimanngitsoq nassuerutigaa:
Atuivallaarneq kingusissukkut paasineqartoq
- Peqqissutsimut Naalakkersuisut akisussaaffeqarfiani aningaasaqarnermik aqutsineq ataatsimut isigalugu akisussaassuseqartumik ingerlanneqarpoq, kisianni peqqinnissaq pillugu ataatsimiititaliarsuamut coronap nalaani aningaasaqarnikkut siunnersuineq annikippallaarsimasoq nassuerutigineqartariaqarpoq, Mimi Karlsen Sermitsiaq.AG-mut allagaqarluni taama oqarpoq.
Mimi Karlsenip oqarnera naapertorlugu, Peqqinnissaq pillugu ataatsimiititaliarsuup aningaasaliissutit 6,5 mio. kr.-t ukiunut agguataarneqartut suliassanut pilersaarutit malillugit naatsorsuutigineqartut aaqqissorsimanngimmagit ajornartorsiortoqalerpoq.
- Ukiuni 2020-2021-2022-mi pisianut isumaqatigiissutigineqartunut pisiortorfigineqartut ataasiakkaat akiligassanik anginerusunik nassiussiniarnerminnik kinguaattooqqammata, ukioq manna akiligassat ataatsimoortut nassiunneqarmata atuivallaarneq kingusissukkut paasinarsivoq, Mimi Karlsen allappoq.
Peqqinnissaq pillugu ataatsimiititaliarsuaq 2020-mi 2 mio. kr.-nik, 2021-mi 3 mio. kr.-nik aamma 2022-mi 1,5 mio. kr.-nik aningaasaliiffigineqarpoq. Tamatuma saniatigut tapiliussatut 1,1 mio. kr.-nik aningaasaliiffigineqarpoq.