Mimi Karlsenip atorfimmi pingaarutilimmi Kielsen taarserpaa
Peqqissutsimut naalakkersuisoq, Mimi Karlsen, Inatsisartunut siulittaasunngorpoq.
Kim Kielsen Inatsisartunut siulittaasuujunnaarpoq. IA-meersup Mimi Karlsenip Siumumi siulittaasuusimasoq atorfimmi kingoraassavaa.
IA-p aamma Siumup ukiakkut ataatsimiinnerup aallartinneranut atatillugu tamanna innersuussipput.
Mimi Karlsen Naalakkersuisunit tunuarpoq, ataatsimiinnerullu aallartinneranut atatillugu Inatsisartunut uteqqippoq.
Mimi Karlsen Naalakkersuisunut ilaasortanngornerminut atatillugu sulinngiffeqarsimavoq.
Naalakkersuisut siulittaasuata, Múte B. Egedep (IA), peqqinnissaqarfimmut akisussaaffik tigugallarpaa.
Illuatungiliuttut akerliliipput
Jens Napãtôk’ partiimit illuatungiliuttumit Naleeqqameersoq taarsiinermut oqaluttarfimmit akerliliivoq, taarsiullugulu siulittaasoq Kim Kielsen innersuullugu.
Atorfimmi atajuartoqarnissaa pingaaruteqartoq, Naleraq isumaqarpoq.
Demokraatit aamma Kielsenip ingerlaqqinnissaa innersuuppaat, oqaaseqartartoq Nivi Olsen oqarpoq. Kisianni naalakkersuisoqatigiit amerlanerussuteqartut illuatungeraat.
Attaviitsup Knud Mathiassenip partiitoqqani IA innersuussinermini taperserpaa, atorfillu Mimi Karlsenimut tunniunneqassasoq isumaqatigalugu nalunaaruteqarpoq.
Mimi Karlsen 18-inik taaneqarluni siulittaasutut qinerneqarpoq. Asii Chemnitz Narup sinniisuussaaq.