Mingutsitsinikillisaaneq: Kalaallit Nunaat CO²-mut toqqorsivinngorusuppoq
Suliniut CSS (CO²-p imerpalasup nunap iluanut kuutsinneqartarnera) Naalakkersuisut nunarsuatsinni silap pissusaanik ajornartooraluttuinnarnermut annikillisaaqataaffiginialerpaat, tamatuma ilutigisaanik inuussutissarsiutitigut inerisaaneq suliffinnillu pilersitsineq anguneqarsinnaammat, taamak ilisimatitsivoq aningaasaqarnermut, naligiissitaanermut, aatsitassanut inatsisillu atuutsinneqarnerannut Naalakkersuisoq, Naaja H. Nathanielsen.
CO²-mik nunap iluanut toqqorsisarnissamut periusissiaq ulloq aggustip quliganni Naalakkersuisunit akuerineqarpoq. Taamak ilisimatitsivoq aatsitassanut inatsisillu atuutsinneqarnerannut naalakkersuisoqarfik tusagassiuutitigut nalunaaruteqarluni.
Tamanna isumaqarpoq Kalaallit Nunarput maanna CO²-mut toqqorsivissanik piukkunnartunik ujaasiffigineqartussanngortoq - aallaqqaammut misileraataasumik, tassani siunertaavoq misileraalluni CO²-mut toqqorsiviliortoqassasoq. Sumiiffiit assigiinngitsut pingasut, qanoq periarfissaqartiginersut paasiniaaffigineqartussat tassaapput:
- Qeqertarsuup Kitaa
- Niaqunngunaq/Nuup eqqaa
- Kalaallit Nunaata kujataa
Nunatta aningaasarsiorfigilluarsinnaalerumaagaatut isumalluut
Kalaallit Nunaanni CCS-inut suliffissuaqarnermik pilersitsineq, CCS-inut arlariiaanut tigooqqaasussanik inerisaanertut ittoq, sullivissanik nutaanik pilersitsilluni Kalaallit Nunaanni inuussutissarsiornermut suliassaqarfimmik annertuumik piujuatitsiviusussamik nutaamik aallartitsisinnaavoq.
Naatsorsuutigineqarpoq siunissami CO² -nik toqqorsivimmiititsinissaq annertoorujussuarmik aningaasaqarnikkut soqutigineqassasoq, taamaalillunilu Kalaallit Nunaannut annertuumik isertitalersitsisinnaalluni.
Takoreerparput nunat allat CCS iluanni periarfissaminnik misissuillutik aallartilluareersut. Suliaqartuusunut taakkununnga ilaalersinnaanissamut Kalaallit Nunaat CCS-inut periarfissaqarfimminik uppernarsaasariaqarpoq CCS-inullu arlariiaanut ilaalerluni.
CO² -nik unerartitsinissamut toqqorsivimmiititsinissamullu Naalakkersuisut periusissiaat tamaat UANI atuarsinnaavat.