Minik Høegh-Dam pineqaatissinneqarpoq

Minik Høegh-Dam-imut eqqartuussivitsigut suliaq sivisuumik ingerlanneqareerluni Nunatta eqqartuussivianit sisamanngornermi aalajangiiffigineqarpoq.

Nunatta eqqartussivianit inerniliunneqarpoq, aningaasarpassuit inerteqqutaasumik iliornikkut pissarsiarineqarsimasut. Tamanna tunngavigalugu Minik Høegh-Dam aningaasanik 153.000 koruunit missaannik amerlassusilinnik arsaarinniffigineqarpoq.

Tamatuma saniatigut eqqartuussinermi pineqaatissiissutigineqarpoq ulluni 20-ni isertitsivimmiitinneqartussanngorlugu, taamaattorli ukiup ataatsip iluani misilinneqassasoq, pinerluuteqaqqinngikkunilu pineqaatissiissut atorunnaarsinneqassasoq.

Unnerluussisoq immikkut suliaqartitaq Martin Strandby Nielsen Sermitsiaq.AG-mut taamak oqaluttuarpoq.

Miserratiginnikkaluarpoq

Minik Høegh-Dam unnerluussutaasunut miserratiginninnikuuvoq, matumanilu eqqartuunneqarnera sumiiffimmi eqqartuussiviup aalajangernerigalua allanngortinneqarpoq, nunap immikkoortuani eqqartuunneqarnermini Minik Høegh-Dam pinngitsuuutinneqarnikuugaluarpoq.

Ikiaroornartut pillugit inatsisinik unioqqutitsisimaneq, tamatumalu saniatigut tillitanik pisisimasutut unnerluutigineqarpoq.

Immikkut unnerluussisoq naammagisimaarinnippoq, Nunatta Eqqartuussiviata unnerluussisut piumasaqaataat ilaatigut malinneqarmata, maannalu suliaq naammassineqarluni.

Suliaq aallartinneqarpoq 2018-mi, taamanikkut aningaasat 154.805 koruunit Minik Høegh-Dam-ip angerlarsimaffiani nassaarineqarput, aningaasat taakku ilaat 151.900 koruunit isarussat puuaniittut nassaarineqarlutik.

Politiit naapertorlugit aningaasarpassuit taakku ikiaroornartumik hashimik tuniniaanermit pissarsiaapput. Unnerluussisut tamanna aalajangiusimagaluaraat, taamaattoq Nunatta Eqqartuussivianit uppernarsaatit naammanngitsutut nalilerneqarpoq, taamaattorli eqqartussiviup ilalerpaa unnerluussisut oqaatigimmassuk aningaasat unioqqutitsilluni iliuuseqarnikkut pissarsiarineqarsimasut.

Suliaq Minik Høegh-Dam-imut tunngasoq tamat takusinnaasaannik malinnaaffigineqarpoq, taanna Avannaata Kommuniani kommunalbestyrelsimi ilaasortaammat. 2021-mi kommunalbestyrelsimut qinersinermi 406-nit taaguunneqarluni kommunalbestyrelsimi ilaasortanngornikuulluni.