Ministeri: Kalaallit Nunaata Thulep eqqaani saliinissaq utaqqisissimavaa
Avatangiisinut ministeri Troels Lund Poulsen, Venstre, Kalaallit Nunaannut pisuutitsivoq tassa Pituffiup eqqaani eqqakkanik avatangiisimut mingutsitsisunik saliinissaq asuli utaqqisitsisimanerarlugu.
Oqariartuut saqqummerpoq ministerip tusagassiutitigut nalunaarutaani, tamatumani ilanngullugu saqqumiunneqarpoq, Namminersortut ukioq naatinnagu, amerikarmiut Pittuffimmi sakkutooqarfiata eqqaaniittut eqqakkat, qanoq peerneqarnissaannut tunngatillugu iluarsiissutissamik nassaareerniartut.
- Iluarsiissutissarli sivisuallaammik utaqqineqarsimavoq, kisianni uanga maluginiagara tunngavigalugu, maannakkut ataatsimoorussamik iluarsiissutissamik nassaarnissaq politikkikkut piumassuseqarfigineqarpoq, tusagassiutitigut nalunaarummini avatangiisinut ministeri erseqqissaavoq.
Namminersortunit ukioq naatinnagu siunnersuusiorneqassaaq mingutsitsinerup qanoq peerneqarsinnaaneq. Tamanna tamatuma kingorna Danmarkimi politikkikkut oqaluuserineqassaaq, saliineq Danmarkimit aningaasalersorneqassaaq.
Eqqaaveqarfiit - eqqaavissuit - Pittuffiup eqqaani Dundasip qeqertaasaaniipput. Danmark aamma USA 2002-mi isumaqatigiipput Amerikap sumiiffik tamanna qimassagaa, kalaallinit oqartussaaffigineqaqqilerniassammat.
Amerikarmiut sakkutooqarfiup ilaa tamanna Kalaallit Nunaannut utertimmagu avatangiisinik misissuineq anikitsuinnaq ingerlanneqarsimavoq, taamaattumillu Danmarki suliassamut pisussanngorpoq, 2003-mi paasineqarmat qeqertaasap eqqaani avatangiisimut malunnaatilimmik mingutsitsisunik nassaassaqarmat.
Ilaatigut mingutsitsinerup kingunerisaanik eqqusat aqerlumik akoqartut paasineqarpoq aamma siuteqqut suiaassusiat allanngortartoq. Mingutsitsineq Pituffimmi 50-ikkunni aamma 60-ikkunni ingerlatsinermik pisuuvoq.
/ritzau/