Ministeri sarfaaruttoqarmat politiit suliaannik naammagisimaarinnittoq

Ulluni arlalinni innaallagissamik pilersuiniarnermi ajornartorsiuteqarneq, imeqannginneq pisortanullu attaveqarniarnerup ajornartorsiutaanera atugaasimapput.

Sapaatip-akunnerani 48-mi Nuummi sivisuumik sarfaaruttoqarnera innuttaasunut arlalinnik kinguneqarsimavoq, folketingimilu ilaasortap Aaja Chemnitz Larsenip tassunga atatillugu Danmarkimi naalakkersuisunut apeqqutigisimavaa, pisimasoq upalungaarsimanerup Danmarkip akisussaaffigisaata pitsanngorsaaffigineqarnissaanut tunngavissiinnginnersoq.

Danmarkimili inatsisinik atuutsitsinermut ministerip Kalaallit Nunaanni Politiit sarfaaruttoqarneranut atatillugu oqaaseqaataat tunngavigalugit tamanna tunngavissaqannginnerarpaa.

- Nuannaarutigalugu oqaatigisinnaavara, Kalaallit Nunaanni Politiit Kalaallit Nunaanni oqartussanik allanik suleqateqarlutik, Nuummi innuttaasut sarfaaruttoqarneranit ajortumik kingunerluuteqartinnginnissaat anguniarlugu sunniuteqarluartumik pikkorissuseqarlutillu iliuuseqarsimasut. Ilanngullugu innersuussutigisinnaavara, Kalaallit Nunaanni Politiit nalilersimammassuk, pisimasoq upalungaarsimanermut politiit isumagisassaannut tunngatillugit pitsanngorsaanissamut tunngavissaqanngitsoq, inatsisinik atuutsitsinermut ministeri Nick Hækkerup (Soc.) Aaja Chemnitz Larsenimut akissuteqarluni allappoq.

Ajornartorsiuteqartoqarsimasoq marlunngornerup ullaavani uppernarsarneqartoq

Inatsisinik atuutsitsinermut ministerip akissuteqarnissaminut atatillugu Kalaallit Nunaanni Politiit pisimasumik nalileeqqusimavai.

Politiinit ilisimatitsissutigineqarpoq, marlunngornermi novembarip 30-ani ullaakkut arfineq-pingasunut politiit ajornartorsiortoqarnerani suliaqartartui kiisalu Kalaallit Nunaanni Upalungaarsimasut suliaqartinneqarnissaat aalajangiunneqarsimasoq. Ataasinngornermi unnukkut aqqarnup missaani Nuummi innaallagiaq qamippoq:

- Politiinit nalilerneqarsimavoq, piffissami pineqartumi innaallagiaqannginnera, mobilinut internetsimullu attaveqannginnera ajornartorsiornertut isigineqarmat politiit ataqatigiissaarisuussasut, politiit allapput.

Tallingornermi decembarip pingajuani nal. 18.00 alajangiunneqarpoq, pisup malitsigisaanik politiit upalungaarsimajunnaassasut.

Naammattunik sulisussaqarnissaq

Politiit akissuteqarnerminni upalungaarsimanerup pitsanngorsarneqarnissaanut tunngavissaqannginnermut arlalinnik pissuteqartoq oqaatigaat:

• 2021-mi novembarip 30-ata unnuaani ullaavanilu pigaartut pisortaatut sulisuusut pisoq malinnaaffigisimavaat, piffissaagallartillugulu aalajangersimallutik upalungaarsimasut sulisinneqalissasut. Politiit qullersaat ingerlaannartumik nalunaarfigineqarsimapput, sulisussatullu pisariaqartinneqartut sukkasuupilussuarmik sulilersinnarsimallutik. Tassunga atatillugu oqaatigineqassaaq, politiit innaallagiaqanngikkaluartoq, mobilit internetsilu attaveqanngikkaluartut suliartortussaammata, taamaammat sulisussanik pissarsiniarneq ajornartorsiutaasimanngitsoq.
• Politiinit nalilerneqarsimavoq, politiit suliaqarnerup tamarmiusup ingerlanerani sulisussanik, piginnaasalinnik isumalluutissanillu naammattunik pissarsisinnaasimasut, soorlu aamma mobilinut attaveqaateqannginnermi politiit illoqarfimmi sumiiffinni assigiinngitsuni immikkut angalatitaqarsimasut, Nuullu avataani politeeqarfiit IP-telefoniivi attaveerutissagaluarapata iliuusissanik siunnersuuteqarsinnaasut upalungaarsimasullu oqarasuaatilerneqarsimapput satellitsimut attaveqarsinnaasunik, tamanna KNR-kkut upalungaarsimasut nalunaarutigisartussaallugu. Tamakkua saniatigut Kalaallit Nunaanni Upalungaarsimasut politiit radioinik tunineqarsimapput, taamaalillutik upalungaarsimasortaminnut attaveqarsinnaaniassammata.

Politiit tamatuma saniatigut Issittumi Sakkutooqarfimmut Nuummiu Qatserisartoqarfimmut nersorinnipput. Issittumi Sakkutooqarfik Nuup eqqaani umiarsuarnik marlunik upalungaarsimasussanik inissitsitsisimavoq, tassunga ilanngullugu peqqinnissatigut suliaqarsinnaasunik ilaatitsisimallutik. Sakkutooqarfik aamma immikkut qulimiguuliisimavoq.

Poliiit naapertorlugit, Nuummi Qatersisartoqarfik biilinik pingasunik atugassiisimavoq, taakku politiit biilii peqatigalugit innuttaasut upalungaarsimasunut nalunaaruteqarnissaannut atorneqarsimapput.

Politiit akissuteqaamminni erseqqissaassutigaat, Tusass-imi Nukissiorfinnilu sarfaaruttoqarneranut atatillugu teknikkikkut upalungaarsimasoqarnissaanik pisariaqartitsisoqarsimanngitsoq.