Ministeriap Dorisimut akissutaa: Kalaallit amerlanerusut Illersornissaqarfimmi takorusuppavut
Kalaallit amerlanerusut Qimusserluni alapernaarsuisuni Siriusimi peqataasartut amerlanerusariaqartut, politikeri Doris J. Jensen isumaqarpoq. Illersornissamut ministereqarfiup kalaallit Illersornissaqarfimmi sulisut amerlanerunissaat kissaatigaat, tassanngaanniillu alapernaarsuisunut qinnuteqarsinnaapput.
Qimusserlutik alapernaarsuisut Sirius pillugu piviusulersaarut DR-imi aallakaatinneqarneranut atatillugu, alapernaarsuisut kalaallinit peqataaffigineqartariaqartut, politikeri Doris J. Jensen oqariartuuteqarpoq.
Canadami inuit Canada Rangersimut qanoq peqataatinneqartarnerannut taanna ilaatigut innersuussivoq, taakku aamma sakkutuut immikkoortoqarfigaat.
AAMMA ATUARUK: Politikeri: Siriuspatruljen kalaallinit aalajangersimasumik peqataaffigineqartariaqaraluarpoq
Ataatsimut isigalugu kalaallit sakkutuut amerlanerusut kissaatigineqartut, Doris J. Jensenip siunnersuutaanut Danmarkimi Illersornissamut ministereqarfimmit akissutitut oqariartuutigineqarpoq:
- Kalaallit amerlanerusut Illersornissaqarfiup suliaqarnerannut peqataasut amerlanerunissaat kissaatigaa, ministereqarfik allappoq, tassanngaanniillu ilinniakkamik nutaamik kalaallit amerlanerusut sakkutuunngornissaannut periarfissiisinnaasumik peqalertussaasoq aamma innersuussilluni.
Akuerineqarnissamut piumasaqaatinut innersuussisoq
- Illersornissaqarfik kalaallit oqartussaannik suleqateqarluni Issittumi tunngaviusumik ilinniakkamik pilersitsileruttortoq, illersornissamut ministereqarfik ilisimatitsivoq, taanna Illersornissaqarfimmi ilinniakkanut allanut ingerlariaqqiffiusinnaavoq, akissummi tamanna allaqqavoq.
Issittumi piginnaasanik annertusaanissamik suliaqarnermut ministereqarfik innersuussivoq, tassani nunatsinni sakkutuutut/upalungaarsimasutut ilinniarfimmik pilersitsinissaq suliarineqarpoq.
Qimusserluni alapernaarsuisuni Siriusimi kalaallit peqataasut amerlanerunissaannut apeqqummut tunngatillugu, ministereqarfik peqataanissamut akuerisaanissamut piumasaqaatinut innersuussivoq:
- Qimusserluni alapernaarsuisuni Siriusimi aqutsisutut ilinniarnialernissamut, Issittumi tunngaviusumik ilinniarsimanerut saniatigut – aamma ilaatigut Illersornissaqarfimmi imaluunniit Danmarkimi Upalungaarsimanermut Aqutsisoqarfimmi piareersaataasumik ilinniarsimanissaq piumasaqaataavoq, ministereqarfimmit taama akissuteqartoqarpoq, tassani akissut itinerusumik oqaluusererusunngilaat.
Sakkutuujusussaaneq pillugu oqallinneq sivisooq
Ilinniakkat piumasaqaataasut saniatigut Qimusserluni alapernaarsuisunut qinnuteqartut aamma akuerineqarnissaminnut misilitsittarput, tassani misilitsittut nukittussusaat aamma pinertussusaat kiisalu suleqatigiissinnaanermut piginnaasaat misilittarneqartarput.
Naalakkersuisut 2021-mi Illersornissaqarfiup nunatsinni sakkutuujusussaanermut misilitsitsisarnerinik unitsitsinissaannik qinnuiginninnerisa kingorna, kalaallit inuusuttut Illersornissaqarfimmut peqataasinnaanerat piffissami sivisuumi oqaluuserineqarnikuuvoq.
Siumut Inuit Ataqatigiillu naalakkersuisoqatigiilernerisa kingorna, Kalaallit Nunaanni sakkutuujusussaanermut misilitsittarnerit atulerseqqinneqarnissaannik Naalakkersuisut danskit naalakkersuisuinut qinnuteqaatiginikuuaat.