Ministerimik tikeraartoqarneq: Illersornissamut ministeri Troels Lund Poulsen Nuummiippoq
Ilimanarpoq ministerip avatangiiseritsiakkani sorsuffiunngitsoq aporaaffiunngitsorlu anersaartorfigillualaassagaa. Taamaattorli oqaluuserisassat pingaarutillit ataatimiissutigineqarput, pingaartumik issittup sakkussiaqarnikkut aporaaffiunnginnissaanik qulakkeerinninniarnermut tunngassuteqartut eqqartussallugit illersornissamut ministeri Kalaallit Nunatsinnut tikeraarpoq.
Issittumi Sakkutooqarfimmiut ittuunersartik pulaartorivaat, tassa illersornissamut ministeri Troels Lund Poulsen (Venstre).
Qularnanngilaq aamma ullut marluk ministerip Nunatsinni tikeraarnermini ulapaarfigissagai.
Taanna pingasunngornermi ullaap tungaani taanna Nuummut tikippoq aqagulu uternissami tungaanut pilersaaruterpassuaqarpoq naammassiniagassaminik.
Issittumi Sakkutooqarfimmiut ittuunersartik pulaartorivaat, tassa illersornissamut ministeri Troels Lund Poulsen (Venstre).
Taamatuttaaq Naalagaaffinngornissamut Nunanullu Allanut Naalakkersuisoq, Vivian Motzfeldt (Siumut) ataatsimeeqatigaa, qularnanngitsumillu naalakkersuisut sinneri pisinnaasut aamma ilassisimassallugit.
Pingasunngornermi ualikkut kingusinnerusukkut Vivian Motzfeldt peqatigalugu Nuummi katersortarfimmi innuttaasunik ataatsimiitsitsissapput piffissami 16:30-18:00.
Aqagu sisamanngornermi Danmarkimut utissaaq, utertiganili aamma Kangerlussuarmi ilinniarfik nutaarluinnaq, tassalu Issittumi tunngaviusumik ilinniarfik, inuusuttunit pilerigineqaqisoq maannalu piareersarneqaleruttortoq pulaassavaa.
Ilinniarfimmi tassani nutaami siullersaallutik ilinnialersussat pilersaarutit malillugit aallartittussaapput 6. maj 2024.