Ministerit issittup eqqaamiut ataatsimiinnerminni silaannaq eqqartussavaat
Nunat issittup eqqaaniitut nunanut allanut ministeriisa qaammatit pingasut qaangiuppata Tromsømi ataatsimiilerpata, saqqummiunneqartussat ilagaat sersermsuit aakkiartortut pillugit ilisimatusarnikkut misissuinerni paasisat nutaat.
Ilisimatusarnikkut misissuineq nutaarlutinnaq uunga tunngasoq, silaannaap annikitsunnguamik kissannerata qanoq ilulluni Kalaallit Nunaanni sermersuit aatsikkiartorai, saqqummiunneqassaaq nunat Issittup qanittuaniittut nunanut allanut ministeriisa qaammatit pingasut qaangiuppata Norgep avannaaniittumi illoqarfimmi Tromsø naapippata.
Norgep nunanut allanut ministeria, Jonas Gahr Støre, arlaleriarluni paasitittarpaa Norgep siunertarissaa tassaasoq siulittaasutut inissisimanini naggaserniarlugu, FN-ip silaannaap allanngoriartornera pillugu Københavnimi decembarimi ataatsimeersuartitsinissaata tungaanut sakkortuumik nalunaaruteqarniarluni, ataatsimeersuartitsinermimi tassani silaannaap allanngoriartornera akiorniarlugu nunarsuaq tamakkerlugu isumaqatigiissutissaq naammassineqartussaammat.
Nutaarsiassaqartitsiviup NTB-ip paasivaa, tamanna pillugu Norgemi naalakkersuisut nunanut allanut ministerit immikkut ittumik silaannaap allanngoriartornera pillugu ataatsimiitinniarlugit sulissuteqartoq, tamannalu ingerlanniarneqartoq ministerit ataatsimiilivinnissaat 28. apriili ullumik ataatsimik sioqqullugu.
Arktisk Rådip suleqatigiissitaliaani Arctic Monitoring and Assessment Programme (AMAP) ilisimatuut misissuisut piareersimapput, Kalaallit Nunaanni sermersuup aakkiartornera pillugu misissuinerminni nalunaarusiaq nutartigaq, saqqummiutissallugu.