Ministeriunerup ammaanersiorluni oqalugiarnerani kalaallit meerartaat ilanngunneqartut

Ministriunerup Mette Fredriksenip (Soc) ullumi Folketingimi ammaanersiorluni oqalugiarnermini oqaatigaa, ministeriuninngoqqammerluni Kalaallit Nunaannut tikeraarsimalluni.

Tikeraarneq ilisimaneqartutut præsidentip Trumpip Kalaallit Nunaannik pisiaqarusunneranit sunnerneqarsimaqaaq. Tikeraarnermili sammisassatut pilersaarutini meeqqat atugaat ukkatarineqarsimapput, tamannalumi Mette Frederiksenip ammaanersiorluni oqalugiarnermini oqaatigaa.

- Naalakkersuisut Siulittaasuata Kim Kielsenip uangalu suleqatigiinnerput, marluulluta pingaartilluinnakkatsinnut tunngatillugu aallartipparput: Kalaallit meerartaat, taanna oqarpoq.

- Malugisimavara, ajornartorsiutit pillugit oqaloqatiginninnissamut nutaamik piumassuseqartoqalersimasoq. Aamma ajornartorsiutit artornartut pillugit. Imminortarneq. Atornerluisuuneq. Kanngutsaattuliortarnerlu.

- Kalaallit Nunaannit Danmark kaammattorneqarsimavoq, meeqqat pillugit suleqatigiittoqarnerunissaanik. Tamanna akuersaarsimavara. Soorunami suleqatigiinnerunissamut angersimavunga!

- Kalaallit Nunaanni meeqqat inuusuttullu atugarliortut pitsaanerusumik ulloqartinneqartalissapput. Siunissamullu neriuuteqartinneqalerlutik.

Issittumut tunngatillugu soqutigisallit amerliartortut

Mette Frederiksenip oqalugiarnermini aamma eqqaavaa, Kalaallit Nunaata Savalimmiullu nunanut tamalaanut pingaaruteqaleriartuinnarnerat.

- Silap pissusaata allanngoriartornerata aamma Issittumut tunngatillugu soqutiginnittoqarnerata Savalimmiut Kalaallillu Nunaat nunanut tamalaanut akulerutsikkiartuinnarpaat. Savalimmut Kalaallillu Nunaata nunanut allanut sillimaniarnermullu tunngatillugit akuutinneqarnerunissamik kissaataat paasilluarsinnaavara.
- Suleqatigiinnitta nukittorsarneqarnissaanut isumaqataavunga. Ilisimasanik paasissutissanillu avitseqatigiittassaagut.

- Nunaavugut pingasut, Inuiaat pingasut, Piorsarsimassutsit pingasut. Aammali nukittuumik ataqatigiippugut. Suliassaqarfiit tamatsinnut iluaqutaasinnaasut pillugit suleqatigiinnissatsinnut kaammattuivunga.

- Atlantikup avannaanit Folketingimi ilaasortaatitatsinnut oqarusuppunga, danskit naalakkersuisuisa suleqatiginissarsi – aamma ilaatinneqartarnissarsi – pingaartilluinnarpaat.

Oqalugiaatini naggaserlugu sammineqartut taakku marluk imminnut atasuunerarpai.

Kalaallit inuusuttai aatsaat taamak pisariaqartinneqartigipput. Nunamut kusanartumut nuannarsumullu siuttuuvugut. Nuna, silap allanngoriartornerani qanoq inuusoqarneranik nunarsuarmut tamarmut takutitsisoq.