MIO: 2016-mili meeqqat unnuiffissaminnik noqqaalerput

Meeqqat oqaaseqartartuat, Aviâja Egede Lynge, sakkortuumik isornartorsiuteqarpoq meeqqat imminiiginnarneqartarnerat allaallu silami sinittarnerat pil

Ullumikkut meeqqat nunatsinni kommunini arlalinni ilaqutariinnut sullissiviit ataanni ornittakkani toqqissillutik sinissinnaasarput. Taamaattorli aaqqissuussineq akissarsiffinnuunerusoq tunngatinneqarpoq.Meeqqat oqaaseqartartuat, Aviâja Egede Lynge erseqqissaavoq meeqqat namminneq 2016-mili kissaatigigaat sukkulluunniit toqqissisimanngikkaangamik unnuiffigisinnaasaminnik pilersitsisoqartariaqartoq.

- Ataqqinnillunga. Ajornartorsiut nutaajunngilaq. 2016-mili meeqqat unnuisarfissaqarnissaminnik kissaateqarnerat Mio-mit apuupparput. Tamannarpiaq aamma NAKUUSA'p meerartaasa namminneq apuunnikuuaat.

Taamak aallarniilluni meeqqat oqaaseqartartuat Facebookimi isornartorsiuivoq. Taassuma tupigusuutiginerarpaa sooq aatsaat Facebookimi assimik takunneqqaarluni iliuuseqartoqarnialernersoq.

Asseq matumani innersuussutigineqarpoq tassaavoq meeqqat mikisut marluk silami issiaviup isiginnaartarfiup ataani tallimanngornerup arfininngornerullu akornanni unnuakkut sinittut.

Oqaluuserisassaagaluaq nipaarsaarutaq

Meeqqat oqaaseqartartuata innuttaasoq assimik saqqummiussisimasoq qutsavigaa, aamma killissamik qaangiisimasutut nalilerneqarsinnaagaluarpalluunniit.

- Kisianni sooruna? Politikerit nalunngilaat, oqartussaasut nalunngilaat, innuttaasut nalunngilaat. Taava sooq assimik Facebookikkut ikkussamik aatsaat takoqqaaarluni nikussaartoqassava, Aviâja Egede Lynge oqarpoq nangillunilu:

- Nalunngilara una qisuariaatitut saqqummiussara uissuummisitsiniutitut paasineqarsinnaasoq. Taamaattorli aamma uissuumminarpoq, annertuumik meeqqat angajoqqaavilu tusaaneqaqqullugit tamaviaaraluarluni siuariartortoqarani kaavilukaaruusaaginnartoqarmat.

Akissarsiffinni meeqqat angerlarsimaffiup avataani sinissinnaapput

Meeqqat angajoqqaaminnit paarineqannginnertik pillugu, unnuakkut sumunnarfissaaruttartut qanoq ajornartorsiutaatiginersoq misissuisoqarsimaneq tunngavigalugu ilisimaneqanngilaq.

Taamaattorli ilaqutariinnut kiffartuussiviit aammalu ilaqutariit illui pillugit VIVE (atugarissaarnermut ilisimatuussutsikkut misissueqqissaartarfik) 2022-mi misissuinikuuvoq, tassanilu erseqqissarneqarpoq sumiiffinni arlalinni meeqqat toqqissillutik angerlarsimaffiup avataani siniffissaqartinneqartartut. Aaqqissuussilerli taanna pingaartumik akissarsiffiup nalaani amerlanertigut atuutsinneqartarpoq.

Qeqqata Kommunia, Avannaata Kommunia aammalu Kommune Kujalleq ilaqutatiinnut sullissiviit ilaqutariillu illui aqqutigalugit meeqqanut unnuinissamik neqerooruteqartarput, tassa meeqqat ornittagaqartinneqarlutik angerlarsimaffimminniissinnaanngiffimminni toqqissisimaffigisinnaasaminnik.

Powered by Labrador CMS