MIO meeqqat peqqinnissaqarfimmi sullinneqarnerat pillugu: Toqusoornerit pingasut misissuiffigai

Meeqqat peqqinnissaqarfimmi sullinneqarnerat pillugu MIO misissuinermini angajoqqaat suleqatigalugit meeqqat napparsimmavimmi allagaataannik piniarsimavoq.

MIO-p misissuinermini meeqqat arfineq-pingasut nunatsinni napparsimmaveqarfimmi sullinneqarnerat misissorsimavaa. Suliani pingasuusuni meeqqat suli atualeratik toqusimapput.

- Misissuinerput ajoraluartumik uppernarsarpaa, meeqqat peqqinnisamik pisinnaatitaaffii ilungersunartumik innarlerneqartarsimasut. Ernumatsappunga assut meeqqat peqqinnissaqarnerup iluani sumiginnagaasimasut pillugit. Ilaatigummi allaat toqumik kinguneqartarsimammat. Taamatummi pisoqaqqusaanngilaq, meeqqat oqaaseqartartuat Aviâja Egede Lynge oqarpoq.

Arfinilinnik ukiullip Manuminap angajoqqaavisa Nuummi peqqinnissaqarfimmi sulisut pisussaaffimminnik naammassinnissimanngitsutut politiinut tunniussimavaat. Peqqinnissaqarfimmi suliaritereernerup kingorna Manumina ukioq manna toquvoq.

Meeqqamik toqusoortut kisimiinngillat

Aviâja Egede Lynge oqaluttuarpoq Manumina pillugu pisoq kisiartaanngitsoq:

- Manumina toqqusaap qinersimini pilatsittareerluni toqusup pillugu maannakkorpiaq suliassatut ingerlaartoq, tassaavoq assersuut annilaarnartoq, tassami peqqissaqarnikkut katsorsartinnermik kukkunikkut ajutoornertut assersuutaammat.

- Suliassani allani MIO´p misissuinermini aamma assingusumik pisoqartarsimavoq. Angajoqqaat itigartitaasutut susinnaajunnaartutullu misigisimapput, nassuertariaqarpugullu, meeqqanut peqqinnissaqarnikkut aaqqissuussinerput peqqinnissamik katsorsaanissaminnut suliassartik artorsimagaat, naak meeqqat pisinnaatitaaffigigaluaraat peqqinnissaqarnikkut qaffasinnerpaamik pineqarnissartik, Aviâja Egede Lynge oqarpoq.

Meeqqat pillugit isumaqatigiissut uniorneqarpoq

Meeqqat pillugit oqaaseqartartup erseqqissarpaa meeqqat napparsimmaveqarfinnit sullinneqarneranni allagaatit meeqqat arfineq-pingasut pillugit misissuiffigisimagitsik. Misissuinerit toqqammavigalugit meeqqat pillugit nunat tamalaat isumaqatigiissutaat malinneqanngitsoq erseqqissarneqarpoq.

Assersuummi ataatsimi maluginiarneqarpoq meeraq aatsaat toqoreersoq meeqqat nakorsaannit misissorneqarsimammat.

- Peqqutaasimasinnaavoq sumiiffimmi siullermik meeqqanut nakorsaqarsimannginnera. Nakorsiarnermi allagaatini allassimanngilaq sooq siusinnerusukkut meeqqat nakorsaannut nakorsiartoq misissorneqaqquneqarsimannginnera, MIO allappoq.

Sermitsiaq.AG assigalugu MIO-p misissuinermini paasivaa meeqqat amerluuteqartut pillugit angajoqqaat arlaleriarlutik saaffiginnittaraluartut, misissuinerilli piffissaatillugu aallartinneqarnersut ilumut apeqquserneqartariaqartoq.

Meeqqat peqqinnissaqarfimmi sullinneqarnerat pillugu MIO misissuereernermini qulingiluanik innersuussuteqarpoq.

Ukuusut:

1. Meeqqap nammineq paasinnittaasia najoqqutaralugu napparsimaviit nalunaarsuiffiini ersersinneqartassaaq
2. Meeqqanik misissuisoqartillugu piffissatigut innersuussutigineqartut malinneqartarnissaat
3. Meeqqat peqqinnissaqarfimmi naligiimmik suliaritinnissaat qulakkeerumallugu nakorsaqarnikkut piginnaasat aqqutigalugit qulakkeerneqarnissaat
4. Meeqqanut illoqarfiit avataaniittunut peqqinnissaqarnikkut neqeroorutaasut misissorneqarnissaat
5. Kukkusumik suliaritissimanermi taarsiivigitinnissaq anguneqassasoq inatsisit nutarterneqarnerisigut
6. Napparsimasutut naammagittaalliornissami tikikkuminartumik ajornanngitsumillu aaqqissuussinikkut
7. Naammagittaalliornissamik oqitsunnguamik takujuminartumillu periarfissiinikkut
8. Katsorsaanermik ilitsersuutit inuiaqatigiinnut tamanut saqqummersitat, nutartikkallu
9. Nalunaarsuisussaatitaaneq ukkatarineqarnerunissaa anguniaqquneqarpoq