MIO misissuereersoq paasinarsivoq anguniagassat annertusut

MIO-p ulluni makkunani kommunini meeqqanik sullissisarnermik nalunaarusiaq nutaaq saqqummiuppaa. Misissuisitsinerup inernerata paasinarsisippaa meeqqanik pisariaqartitsinerpaanik sukkasuumik pitsaasumillu sullissiniarneq annertuunik unamminartortaqartoq. Ingammik meeqqat atugarliornerpaat tamatuminnga eqqugaasarput.

Misissuititsinermut atatillugu MIO-p kommuninit sisamaasunit inunnik isumaginninnermi sulianik sullissisartut aqutsisullu isumaat misilittagaallu pillugit apersorsimavai. Meeqqat Illersuisuat Aaja Chemnitz Larsen oqaaseqarpoq:

- Nalunaarusiap siunertarinngilaa sullissisut avammut ajortumik isigineqartilernissaat, taakkumi annertuumik suliaqartuupput – akulikitsumik sulinermi atugassarititaasut pitsaanngilluinnartut atorlugit sulisarput – kisiannili inunnik sullissinermi atugassarititaasut pitsanngorsaaviginiarlugit qaammarsaaviginiarneqarput, aamma kinguneqartussanik siunnersuuteqarnissaq siunertaavoq.

Ajornartorsiutit annertuut
Nalunaarusiami ajornartorsiutit pingasut pingaarnerit sammineqarput. Siullermik sumiiffinni sulisut ikippallaarput, tamannalu meeraq atugarliortoq ikiorneqarnissaminnillu pisariaqartitsisoq nalunaarutigineqaraangat inunnik sullissisut qanoq sukkatigisumik qisuariarsinnaanerannut sunniuteqartarpoq.

Aappassaanik inunnik sullissisut piginnaanngorsaqqinnissaannik pisariaqartitsisoqarpoq, inunnik sullissinerminni suliassat arlalinnik ajornartorsiutitaqartut suliarinissaannut atortussaqaqqullugit.

Pingajussaanik pisariaqartitsisoqarpoq inunnik sullissisartut iliuuseqarsinnaanissaminnut periarfissaasa qulakkeerneqarnissaat – soorlu inissiivissat imaluunniit katsorsaanermik neqeroorfiusinnaasut – taakku amerlassutsimikkut naammattuusariaqarput aammalu meeqqat ilaqutaasalu ajornartorsiutaannik aaqqiiniarnissaminnut piginnaasaqartariaqarput.

Iliuuseqartoqartariaqartoq
- Tamakku tamaasa aaqqiiviginiarlugit iliuuseqarfigisariaqarpagut, meeqqat pitsaasumik peroriartornissaat qulakkiissagutsigu, Meeqqat Illersuisuat oqarpoq nangillunilu:

- Maannakkorpiaq meeqqat atugarliornerpaat pissutsinik pitsaanngitsunik eqqugaanerpaapput.

Amigaatigineqartut meeqqanut ataasiakkaanut kinguneqartarput, soorlu meeraq imminut suliamut ilanngutitsinneqartarnersoq qulakkeerneqarsinnaanngilaq, aamma meeraq illorisimaarluni inuunersoq qulakkeerumallugu suliassartaanik malersueqqittoqarsinnaanngilaq, aammalu meeqqamut suliniutissanik ilumut qulakkeerinnilluni pilersaaruteqartoqarnersoq apeqqutaalersarpoq, pilersaarutimmi ingerlaavartumik aalajangersimasumillu sullinneqarnissaanik siunertallit iluamik ikiorneqarnissaat qulakkeersinnaammassuk.

- Isumaqarpunga immitsinnut apeqquserluta akisussaassuseqarlutalu oqartariaqartugut ilumut naammattunik nukissaqartoqarnersoq, piginnaasaqartoqarnersoq aammalu iliuuseqarnissamut periarfissaqartoqarnersoq. Meeqqat inuiaqatigiinni atugarliornerpaat tapersersorsinnaassagutsigit inunnik isumaginninnermik suliaqarfiup nukittorsaaviginissaata politikkikkut suliaqarfiginissaa piumassuseqarfigineqartaria-qarpoq nukissaqarfigineqarlunilu, Aaja Chemnitz Larsen oqarpoq.

Nalunaarusiaq talerpiata tungaani aaneqarsinnaavoq