MIPI-p pitsaanerusunik atugassaqarnissaa itigartippaat
Meeqqat Inuusuttullu Pillugit Ilisimasaqarfik Ilimmarfimmi inissaqanngilaq, naalakkersuisut tunngavilersuipput. - Uggornaqaaq, MIPI-p siulittaasua oqarpoq.
Namminersornerullutik Oqartussat Meeqqat Inuusuttullu Pillugit Ilisimasaqarfiata MIPI-p sinaakkutamigut atugassarisaasa allanngortinnissaat naalakkersuisut itigartippaat. Tamanna takuneqarsinnaavoq Inuit Ataqatigiit siunnersuutaannut naalakkersuisut akissuteqaataanni, IA-p siunnersuutigigaluaramiuk MIPI-mut inatsisip allanngortinneqarnissaa, taamaasilluni ilisimasaqarfik ilisimatusarnermik ingerlatsisinnaanngorlugu.
Tamanna peqatigalugu IA-p siunnersuutigaa MIPI nammineq ilisimatusarfittut Ilimmarfimmut inissinneqassasoq, Oqaasileriffik, Allagaateqarfik, Groenlandica aamma Kalaallit Nunaanni Naatsorsueqqissaartarfik assigalugit.
IA-p siunnersuutai aallaaveqarput MIPI-p siunissaanik inassuteqaatinik arlinnik, ilisimasaqarfiup siulersuisuisa 2006-imi saqqummiussimasaanik.
Naalakkersuisulli naapertorlugit piffissangaatsiaq aatsaat ingerlareerpat MIPI-p inissisimanera allanngortinneqassaaq.
Akissuteqaammini Ilaqutariinnermut Peqqinnissamullu naalakkersuisup Aqqalu Abelsenip, Atassut, nassuerutigaa piffissanngortoq MIPI-p siunissaata qimerluualaarnissaanut. Ilanngullugulu IA-meersup Asii Chemnitz Narupip siunnersuutaa taallugu "takorluuinertut" ilisimasaqarfiullu iluatsitsilluarsimanera nassuerutigalugu.
- MIPI meeqqanut inuusuttunullu ilisimasanik katersuinerminut atatilllugu sulilluarsimasorujussuuvoq, Aqqalu Abelsen akissuteqaammmini allappoq.
Taamaakkaluartoq ilinniartitaanermut naalakkersuisoqarfimmit (KIIIN) tusarniaanermi akissut tunngaviaa, taanna isumaqarmat MIPI Ilimmarfimmi inissaqanngitsoq. Taamaattumik taarsiullugu maanna suleqatigiissitaliamik pilersitsisoqassaaq, MIPI-p aaqqissuussaanikkut inissinneqarfissaanik siunnersuuteqartussamik.
Pakatsipput
MIPI-mi akissuteqaat pakatsisitsivoq.
- Isumaqarpunga tamanna uggornartorujussuusoq, naalakkersuisulli nalunaarutaat tusaatissatut tiguarput, MIPI-p siulittaasua Naaja Nathanielsen oqarpoq tikkuarlugulu MIPI pillugu inatsimmi oqaaseqaatini allassimagaluartoq isumaliutaasoq ilisimasaqarfik Ilimmarfimmiissasoq.
- Inissaqanngippalli inissamik annertunerusumik angakkuarsinnaanngilagut, Naaja Nathanielsen oqarpoq.
Taassuma erseqqissarpaa siulersuisut inassuteqaataat allanngortinneqarsimanngitsut.
- Suli isumaqartuarpugut pingaaruteqartorujussuusoq MIPI-p qilersorsimannginnissaa, MIPI-llu piffissaq ungasinnerusoq isigalugu Kalaallit Nunaanni meeqqanik inuusuttunillu ilisimatusarneq tapersersussagaa annertunerusumillu ilisimatusarluni, annertunerusumillu sammisaqartitsilerluni. Siuniassamut takorluukkavut tamanna pissutigalugu allanngorsimanngillat, Naaja Nathanielsen oqarpoq.