Misigissutsit aallavigalugit qinersinerussaaq
Weekendavisenip innuttaasut akornanni susoqarnerani malinnaasut pingasut inatsisartunut qinersinissaq pillugu oqaloqatigisimavai, allaaserisami takilaartumi qulequtalimmi »Det bliver et følelsesvalg« (misigissutsit tunngavigalugit qinersinerussaaq). Aperineqartut pingasut tamarmik isumaqarput nuna tamakkerlugu politikkimi ingerlatsinikkut nikittoqassasoq.
Daniel Thorleifsenip, Kalaallit Nunaata Katersugaasiviani pisortaasup, pikitsitsinissamut isummeqqajaanerit kalaallit nunaannilu politikkip nutaap atugaajartoqqajaalernera takusinnaasoraa. Pingaartumik internetimi maannakkut naalakkersuisuusut killeqanngiusattumik isornartorsiorneqarput. Thorleifsen isumaqarpoq, »inuiaassutimik sorsuuseqarneq«-mik taaneqartoq qinersinermi aalajangiisuussasoq.
»Danskit naalagaaniarnerannut akerliuniarneq suli atuuppoq. Taasinernik pissarsissutaalluarsinnaavoq, tamannalu Siumup qineqqusaarnermi atorluassavaa,« Daniel Thorleifsen oqarpoq. »Kanngunartuliaqarmat naaggaluunniit Siumut siumukkormiu siumukkormiuujuassaaq, aamma Siumut partiiuvioq aaqqissuussaalluartoq.«
Poul Krarup; Kalaallit Nunaanni aviisit annersaanni Sermitsiami ukiorpassuarni aaqqissuisuusoq oqarpoq: »Politikkimi anori nutaaq suerpoq. Suut tamaasa akueriinnarniarneqarunnaarput, tamattalu Air Greenlandimi siulersuisuni pisut soqutigalugit malinnaaffigisimavagut. siumup qinersisartui utoqqaliartuinnarput, IA-lu 1980-ikkunniilli qinersinerit tamaasa siuariartortuarsimavoq. Kisianni qinersinissamut piffissaliussaq toqqarluagaavoq, taamalu Siumut namminersornermut tarrarsorsinnaalluni. Misigissutsit aallaavigalugit qinersinerussaaq, misigissutsinut tunngasut tamaasa aqqusaartorneqassagunarput, aammalu namminersornerulernissaq eqqunneqalermat atorsimasat uteqqinneqassagunarlutik. Kalaallit Nunaanni inuiattut misigisimaneq assorujussuaq sakkortuujusoq puigussanngilarput,« Poul Krarup oqarpoq, aamma eqqaasitsissutigaa misissuinerit naapertorlugit qinersisartut 40 procentii suli aalajangersimanngimmata. Taakulu tiguarniarneqartussaapput. Suut tamaasa atorlugit.
Air Greenlandimi pisortap Michael Binzerip, siulersuisuni pisunik qanimut malinnaasimasup, pikitsitsineq Kalaallit Nunaanni annertuumik allanngortoqalerneranut takussutissatut isigaa. Mihael nammineerluni - sapiilluni inissisimaninilu navianartorsiorlugu - politikkikkut ingerlatsinermi kammalaatigiiaanneq ilaquttanillu ikiuisarneq pillugu oqallinnermik pilersitsisarsimavoq. Air Greenlandip siulersuisuini oqallinnerup inernera silatusaarnermut annertuumik ajugaanertut oqaatigaa.
»Sulisut naammagittaaliornerat politikkikkut aakkiartulernermut Kalaallit NUnaanni ornigukkiartortup sunniutaattut isigaara. Tassami sulisut sinniisaat namminneerlutik Kalaallit Nunaanni namminersornerusut namminneq piginneqatigiiffinnik aqutsinermut innersuussutaasa aalajangiusimanissaat aalajangiusimasimavaat. 'Change' - Obamap taavaa. Isumaqarpunga allanngoriartortoqalersoq aammalu ingerlatseriaaseq politikkut pimoorussinerusoq tunngavigalugu ingerlatsiartortoqalersoq. Taamalu aamma inuussutissarsiornermut. Qiimmaallaataavoq inukulunnguaq maanna pikitsitsilermat.«