Misileraataasimasoq: Naammassineqarnera qujanassaaq
Eva Illum meeqqani misileraataasimasuni suli inuusut arfiniliusut ilaat, 1951-imi danskit naalagaaffiata misileraasimaneranit taarsiiffigitittussanngortoq nuannaarlunilu eqqissiallassimavoq.
Meeqqat misileraataasimasut pillugit suliami kiisami aalajangiisoqarsimavoq .
”Meeqqat misileraataasimasut” sinneri arfinillit suli inuusut 250.000 koruuninik taarsiiffigitillutilluunniit arlaatigut ajunngitsorsiassaqartinneqassasut, Social,- og Ældreministeeriaqarfimmit oqaatigineqarpoq.
Eva Illum meeqqat 1951-imi Danmarkimukartinneqarsimasut 22-t ilagisaat, suliamut atatillugu kiisami aalajangiisoqarneranik soorunami nuannaaruteqarpoq.
- Aalajangiisimaneq pillugu tallimanngormat ilisimatinnearpunga, soorunami ilisimatinneqarama nuannaarpunga, Eva Illum Sermitsiaq.AG-mut oqaluttuarpoq.
- Suliap naammassineqarnera pitsaasuuvoq, ingerlaqqittariaqarpugummi. Ukiorpassuit matuma siornatigut pisimasoq pillugu eqqaatinneqartuarneq oqimaassimaqaaq. Ukiut taama amerlatigisut qullilisarsimaqaanga.
Ministeriuneqarfimmukassasoq
Eva Illum misileraataasimasunilu sinneruttut allat tallimat martsip qulingiluaani ministeriuneqarfimmut qaaqquneqarsimapput. Suliaq kiisami naleqquttumik naammassineqartussanngorpoq.
Eva Illum ullormut pisussamut qilanaarpoq, neriuutiginerarpaalu ullup pitsaasuullunilu eqqaamaneqarnissaanut Kalaallit Nunaannit peqataasoqarumaartoq.
- Soorunami aningaasat sumut atussanerlugit eqqarsaatigisimavara. Eqqaasara siulleq tassaasimavoq, aasarsiortarfitsinni immikkut inimik ataatsimik sanasinnaanerput. Soorunami aamma taamaallunga Kalaallit Nunaannukarnissara takorloorsinnaavara. Ukiut 15-it qaangiupput kingullermik Kalaallit Nunaanniikkatta, Eva Illum naggasiilluni oqarpoq.