Misileraataasimasut: Ministeriunerup utoqqatsernini Nuummi malunnartinniarpaa
Qallunaat ministeriunerat, Mette Frederiksen nunatsinnut martsip 14-aniit 17-ata tungaanut tikeraasaaq. Taanna Naalakkersuisut siulittaasuat Múte Bourup Egedemut tikeraasaaq. Nuummi Ilulissanilu tikeraarneq pissaaq.
![Misileraataasimasut: Ministeriunerup utoqqatsernini Nuummi malunnartinniarpaa Mette Frederiksen, formand for Socialdemokratiet](https://image.sermitsiaq.ag/226078.webp?imageId=226078&width=960&height=640&format=jpg)
Mette Frederiksenip pisortatigoortumik tikeraarnerani ilaatigut isumannaallisaanikkut politikki, Ukrainemi pisut, silap pissusia, mingutsitsinnginnerunissaq kiisalu orsussanit imerpalasunit nukissiuutinik atuiunnaarnissaq ilaatigut eqqartorneqarumaarput.
- Mette Frederiksenip nunatsinnut tikilluaqqunissaa qilanaaraara. Nuummut ministeriunertut aappassaat tikeraassaaq aatsaallu siullermik Ilulissanut
tikeraassalluni. Tikeraarnermi suleqatigiinnerput ersarissarneqassaaq kiisalu kalaallit qallu-naallu attaviinik patajaallisaataassalluni, Naalakkersuisut siulittaasuat Múte Bourup Egede oqarpoq.
Kalaallit meerartaanut 22-nut misileraataasumasunut utoqqatserneq
Ukrainemi pisut - silap pissusiata allanngoriartornera pillugit eqqartuinerit saniatigut ministeriuneq Nuummi pisortatigoortumik aaqqissuusaqarpoq. Taannami Nuummi kalaallit meerartaat 22-it 1951-imi Danmarkimut aallartinneqarsimasut pillugit utoqqatserfigineqarnerat malunnartinniarpaa.
- Aaqqissuussaq katuami pissaaq martsip 15-ani nalunaaqutaq 12.00-miit 14.00-mut, Naalakkersuisut tusagassiuutinut nalunaarummi taama allapput.
Mette Frederiksenip aamma Múte Bourup Egedep Nuummi GUX-imi ilinniarnertuunngorniartut aamma naapissavaat.
- Naatsumik saqqummiissapput, ilinniartullu Naalakkersuisunut Siulittaasoq ministeriunerlu apeqquteqarfiga-lugit oqalliseqataaffigisinnaassavaat. Naalakkersuisut taama nalunaaruteqarnerminni allapput.
Nunani siuttut marluk Ilulissani tikeraarnermi Kangiani takornarianut sullissivik pulaassavaat silallu pissusaata allanngoriartornerata nunami immammilu sunniutai qanimut takusassallugit.