Misissuineq nutaaq: Inuiaqatigiinni imminut toqunnissamik aarlerinartorsiortut inuuniarnermikkut assigiissuteqarput
Inuit ilinniagaqanngitsut suliffeqanngitsulluunniit, ilinniarnissamut suliffittaarnissamulluunniit aamma periarfissaqanngitsut imminut toqunnissamut aarlerinaateqarnerusut, nunatsinni misissuinerup nutaap takutippaa.
Inuit ilinniarnissamut suliffittaarnissamulluunniit periarfissakinnerusut imminut toqunnissamut aarlerinaateqarnerupput.
Nunatsinni Center for Folkesundhedip misissuinerata tamanna takutippaa. Nunatsinni imminut toqunnissamut aarlerinaatinut annertusititsisartut annikillisartullu misissorneqarsimapput.
- Najukkami ilinniarnissamik suliffittaarnissamilluunniit periarfissat killeqartuusinnaapput, imaluunniit ilinniakkamik naammassinninnissaq ajornakusoorsinnaalluni. Pissutsit taakku tamarmik ataatsikkut atuussinnaapput, Syddansk Universitetimi Ilisimatusarfimmilu ph.d.-nngormiaq misissuinermilu pingaarnertut allaaserinnittoq Ivalu Katajavaara Seidler oqarpoq.
10. september WHO-p nunarsuaq tamakkerlugu imminut toqunnissamut pinaveersaartitsinermut ullorititaraa.
Ilinniartitaaneq aqqutissaavoq
Sulinermut ataavanngitsumik attaveqartuuneq, ilinniagaqarsimanngitsutut suliffeqarneq imaluunniit ilinniagaqaratik sulisunik angajoqqaaqarneq imminut toqunnissamut aarlerinaammik annertusititsisartut misissuinerup takutippaa.
Ivalu Katajavaara Seidlerip erseqqissarpaa paasisat nutaat atorlugit pinaveersaartitsineq toqqaannarnerusumut sammisinnaasoq.
- Imminut toqunnissamut aarlerinaateqarneq pillugu misissuinerup takutippaa inuiaqatigiinni pissutsit nikigangaatsiartut. Imminut toqunnissamik pinaveersaartitsinermik suliaqarnermi - pingaartumik inuusuttut ilinniagaqanngitsut suliffeqanngitsullu, inuuniarnermikkullu ilungersuuteqartut annertunerusumik sammineqartariaqarsorinarput, Ivalu Katajavaara Seidler oqarpoq.
Illersuutaasinnaasut pillugit misissuinerit amigaatigineqartut
Misissuinermi imminut toqunnissamut aarlerinaammut annertusaataasartut arlallit qulaajarneqarsimapput. Aarlerinaammut annertunerulersitsisartutut taaneqartunut ilaapput peroriartornermi aqqusaakkat oqimaannerusut, tarnikkut peqqissuunnginneq nappaateqarnerluunniit, misigisat ilunegrsunartut inoqatinulluunniit attaveqarnerit aaqqiagiinngiffiungaatsiartut.
- Imminut toqunnissamut aarlerinaatinik annikillisitsisinnaasut nunatsinni misissorneqarpiarsimanngillat, paasissutissallu amigaataalluinnarlutik. Aarlerinaammik annikillisitsisinnaasutut taaneqarsinnaasut tassaapput angutinut tunngatillugu angerlarsimaffimmi atugarissaarneq, ilaqutaqarnerlu, allaatigineqarpoq.
Ilisimatusarluni paasisat nunatsinni oqartussanut apuunneqarsimapput, imminut toqunnissamut pinaveersaartitsinermi sakkussatut atorneqarsinnaaqqullugit.
WHO-p nunarsuarmi imminut toqunnissamut pinaveersaartitsinermut ullorititaa eqqorlugu Nuummi Tuapannguani qullernik 45-nik nal. 16.00 ikitsisoqassaaq. Qulleeqqat 45-it nunatsinni ukiumut imminut toquttartut amerlaqataattut ikinneqassapput.