Misissuineq: Obamap presidentiunerani pitsanngoriartoqarluarpoq

USA-mi presidentinngorniunnerup sukaruttornerani Barack Obamap ukiuni arfineq pingasuni presidentioreerluni USA pitsaanerulersillugu tunuarnialerpoq.

CNN/ORC-lu misissuinerannit tamanna paasinarsivoq. 54 procentimmi USA-mi 'pissutsit ingerlalluarnerarlugit' taasisimapput. Amerikkarmiut taama pitsaatigisunik 2007-mi inerniliisimanngillat. Tamanna pivoq aningaasaqarnerup ajalusoornera sioqqullugu.

Tupinnanngitsumik partiinut tapersersuisut assigiinngitsumik isummersorput. Demokraatit qinersisartui isumalluarnerupput, taakkumi 85 procentii pissutsinut naammaginnillutik isummermata. Republikanerinilli 21,3 procentiinnaat isumaqataapput.

Partiilli apeqqutaatinnagit USA-mi najugaqartut siunissamut qaamasumik isiginnilersimapput.

Tamanna aamma Obamap nuannarineqarluarneranit ersersitsivoq. CNN-p uuttortaanera aallavigalugu Obama Amerikarmiut 55 procentiisa tapersersormassuk. Nuannarineqarluartorlu Ronald Reagen taamaasillugu qaangerlugu. Reagan 1989-mi presidentiujunnaarami Amerikarmiut 54 procentiinit tapersersorteqarpoq.

US Census Bureaup Amerikami ilaqutariit aningaasaqarnerat ukiaq manna saqqummiuppaa. Tamannalu Obamap pitsanngoriaateqartitsisimaneranut takussutissanut ilaavoq.

2014-p 2015-llu akornanni ilaqutariit aningaasaqarnerat 5,2 procentimik pitsanngoriaateqarsimavoq.

Aningaasaqarnerup ajalusoornerata kingorna USA-mi aningaasaqarneq pitsangoriartulersimasoq taamaasilluni paasinarsivoq.

Innuttaasut 3,5 millionit 2015-mi piitsutut nalunaarsorsimajunnaartut US Census Bureau malillugu erserpoq. Taamaakkaluartoq USA-mi pissakinnerit tupinnaannartumik amerlapput: 43,1 milliininik amerlassuseqaramik.

/ritzau/