Misissuisartut suleqatigiit nutaat politimesterip nuannaarutigai
Meeqqanut kinguaassiutitigut kannguttaatsuliornernut misissuisartut suleqatigiit nutaat inuiaqatigiinni allannguissapput, politimesteri Bjørn Tegner Bay taama oqarpoq.
Folketingimi amerlanerussuteqarluartut marlunngornermi politiinut tunngasumik nutaamik isumaqatigiissuteqarput, taanna Naalagaaffiup politiivinut tamanut ukiuni tulliuttuni sinaakkusiivoq.
Isumaqatigiissut suliniutinut Kalaallit Nunaannut tunngasunut arlalinnik imaqarpoq, ingammik meeqqat kinguaassiutitigut kannguttaatsuliorfigineqartarnerinik misissuisartussanik immikkut sulialinnik pilersitsineq politimesterip Bjørn Tegner Bayip nuannaarutigaa.
- Immikkut sulialinnik siunnersuutip akuerineqarnera Kalaallit Nunaanni Politiinit nuannaarutigisorujussuugipput qularutissaanngilaq.
- Suleqatigiit inuiaqatigiinni allannguinissaat qularnanngilaq, meeqqat kinguaassiutitigut atornerlunneqartarnerannik unammilligassap annertunera pissutigalugu.
Sulineq ingerlaqqissinnaavoq
Ukiuni kingullerni nalunaarutiginninnerit amerliartorsimasut, politimesterip oqaatigaa. Tamatuma ukkatarineqarnerulernerata kingorna tamanna pivoq – aamma politiit tungaannit pitsaaliuinermik suliaqarnikkut:
- Suleqatigiinnik taakkunannga suliaq aallartitarput ingerlateqqissinnaalerparput, taanna oqarpoq.
- Politeeqarfinnilu tamani suleqatit oqilisaavigineqassapput, taakku suleqatigiit maanna suliat ingerlataasa ilaat tigusinnaassammatigit, taanna oqarpoq.
Sulisut 13-it naatsorsuutigineqartut
Politimesterip oqarnera naapertorlugu, suleqatigiit 13-it missaanniissapput:
- Aqutsisoq
- Politiit qulingiluat
- Unnerluussisoq
- Allaffissornermik sulialik
- sulisoq ilinniagartooq misissueqqissaarnermik sulialik
Suleqatigiit tamakkiisunngorunik katillugu 10 aamma 15 millionit koruunit missaannik akeqassapput.
- Kalaallit Nunaanni sulisut amerlineqarnerat tassani pineqarpoq, politimesteri oqarpoq.
Suleqatigiit pilersinneqarnerat 2021-mi amerliartortitsilluni ingerlanissaa, Bjørn Tegner Bayip naatsorsuutigaa, 2022-milu tamakkiisumik inuttalerneqarsimanissaa.
Iluarsartuussinerit ingerlaqqissinnaapput
Immikkut suleqatigiissita saniatigut, kommunefogedinik atorfinitsitsinissamut aamma akissarsiassat suli qulakkeerneqaqqasut politimesterip oqaatigaa.
Kalaallit Nunaannilu politeeqarfinnik iluarsartuussinissamut isumaqatigiissummi aningaasanik immikkoortitsisoqarpoq.
- Aserfallatsaaliinissami kinguaattooqqasoqarpoq, aningaasat ukiorpassuarni politiit sulinerannut atorneqartarmata. Suliffimmi avatangiisit qulakkeerneqarnissaannut tamanna tunngavoq, politimesteri oqarpoq.