Mittarfiit pillugit isumaqatigiissutit inissipput
Demokraatit tapersersuinertik attatiinnarpaat. IA taaseqataassanngilaq.
Mittarfiit pillugit isumaqatigiissut Inatsisartuni pingajussaaneerneqarluni sisamanngorpat ataatsimiissutigineqaruni akuerineqassaaq, ikinnerussuteqartunit itigartinneqassalluni. Inatsisartuni aningaasaqarnermut ataatsimiititaliap isumaliutissiissutaat kingulleq saqqummiunneqarmat tamanna paasinarsivoq.
Demokraatit naalakkersuisunut tapersersuissallutik aalajangeramilli neriorsuutigereerpaat mittarfiit pillugit tapersersuissallutik. Partiilu nangaassuteqarani tapersersuinerminik attassivoq. Inatsisartuni suliap aappassaaneerneqarnerani Danmarkip Kalaallit Airportsimut piginneqataaneranut isumaqatigiissutip imarisaa partiip ujartorpaa. Isumasioqatigiinnerillu arlallit pereermata mittarfiit marluk tallilerneqarnissaannut mittarfimmillu ataatsimik sanaartortoqarnissaanut nangaassuteqaratik tapersiinissaminnut piareersimapput.
- Kalaallit Nunaata oqaluttuarisaanerani ullumimut sanaartornerit annersassaat Inatsisartuni maannakkut aalajangiiffigisussanngorparput, ataatsimiititaliap isumaliutissiissutaani allaqqavoq.
- Taamaammat Siumumiit Demokraatiniillu soorunami nuannaarutigaarput aalajangiinissaq inuiaqatigiinnut nunatsinnullu tamarmut pingaaruteqartigisoq siuttuuffigisinnaagatsigu.
Danskit naalagaaffiata piginneqataatinneqarnera Inuit Ataqatigiinniit isornartorsiorneqarpoq, taakkumi isumaqarput taamaaliornikkut naalagaaffik pissaaneqarpallaassasoq. Imarisallu immikkuualuttui allat partiip aamma isornartoqartippai. Tunngaviusumilli Nuummi Ilulissanilu mittarfiit tallilerneqarnissaat Qaqortumilu mittarfiliornissaq partiip taperserpaa. Taamaammat partii aningaasaqarnermut ataatsimiititaliami taasissanani aalajangerpoq.
- Inuit Ataqatigiit aappassaaneerinninnermi oqaaseqaatigut innersuussutigalugit siunnersuut pillugu taaseqataaniarnata aalajangerpugut, isumaliutissiissummi allaqqavoq.
Tupaallannanngitsumik Partii Naleqqap akerliunini attappaa. Partiip taarsiullugu siunnersuutigaa illoqarfinni qulingiluani mittarfinnik 1.200 miiterisut takitigisunik mittarfiliortitertoqassasoq.
Suleqatigiissitsisut aningaasaqarnermut ataatsimiititaliami ilaasortaatitaqarunnaarnikuupput.