apeqquteqaat
Mittarfiliornissamut Løkke ikiuukkusuttoq
Statsministeri Folketingimilu amerlanerussuteqartut Kalaallit Nunaanni mittarfiliornissamut aningaasaliisussarsiornermi ikiuunnissaamut tapersiipput. Ineriartortitsinissamik ataatsimoorussamik aningaasaateqarneq aqqutissaasinnaasoq ammaffigineqarpoq
Kalaallit Nunaanni suliniutinut aningaasaqarnermullu ineriartortitsinissamut Folketingimi amerlanerussuteqartut taperserpaat.
Aningaasaateqarfittaap mittarfiliornissaq aqqutissiuussinnaagaa
Vantrep Kalaallit Nunaannuut tunngasunut oqaaseqartartua Marcus Knuthip apeqquteqaataa Naalagaaffeqatigiinneq pillugu pingasunngorpat oqallisigineqartussamut tunngatillugu aningaasaateqarfik eqqaavaa. Taassuma Lars Løkke Rasmussenip (V) oqallissaarutitut saqqummiussaa aallaavigalugu.
Vækstfonden, Eksportkreditfonden Den Nordiske Investeringsbankilu aningaasaliisinnaasutut periarfissaasut Lars Lække Rasmussenip nuannaarutigalugu oqaatigaa.
Pisumin mittarfiliornissamut aningaasaateqarfimmik pilersitsisoqarsinnaasoq oqalliseqataaffiginissaa nutaarsiassartaraa.
Aningaasaateqarfik eqqartorneqassaaq
- Naalakkersuisooqatigiit isumaqatigiissutaanni Naalakkersuisut danskit kalaallillu ataatsimoorlutik aningaasaateqarfimmik pilersitsisoqarnissaa kissaatigaat. Aningaasaateqarfik Kalaallit Nunaanni sanaartornermut angallannermullu siunertaqassalluni. Naalakkersuisut saaffiginnissappata kissaatigineqartoq naalakkersuisooqatigiit eqqartuiffigissallugu ammaffigaat, statsministeri oqarpoq.
Ineriartortitsinissamut aningaasaateqarfimmik pilersitsinissaq tusarniaassutigineqarmat Venstrep Kalaallit Nunaat pillugu oqaaseqartartuata Marcus Knuthip Folketingimi ilaasortat, Enhedslinsten minillugu, statsiministerip eqqartuerusunneranut tapersiisut oqaatigaa.
Jyllands Postenimi allaatigisaq ineriartortitseqataanissamut akuersisoqarneranut tunngasoq politikkerinit isumaqataaffigineqarpoq.
'Siuarsaanissaq aningaasaliisussanillu kajumissitsitsinissaq' allaaserisami atuarneqarsinnaavoq.
S V-lu mittarfittaarusupput
Mittarfiit nutaat pilersinneqarnissaat pingaaruteqarpoq, Ventrep Kalaallit Nunaannut tungasunut oqaaseqartartua oqarpoq.
- Tamanna piviusunngorsinnaappat takornariaqarnermut periarfissatsialaavoq, Socialdemokratit tapersiissappata mittarfiliornissaq piviusunngorsinnaasoq Marcus Knuth oqarpoq.
Ineriartortitsinissamulli aningaasaateqarfissaq qanoq ilusilersorneqassanersoq suli nalunarpoq, isumassarsiarli Kalaallit Nunaannut tunngasuusoq arlaleriarluni eqqartorneqareerluni.
- Naalakkersuisooqatigiit ataatsimoorussamik aningaasaateqarfiliornissaq pillugu Danmarkimut saaffiginnissapput. Sanaartornermut attaveqaqatigiinnermullu suliniutit Kalaallit Nunaanni qulakkeerneqassappata aningaasaliisinnaasut isumannaarneqarnissaat pingaasuteqarmat.