Motorit ingerlatiinnartarnerat ileqqupalaajuvoq
Avatangiisinut naalakkersuisup Aqqalu Abelsenip kissaatigaa, biili uninngatillugu motoriata ingerlatiinnartarnera inatsisitigut inerteqqutaalissasoq, KNR oqaluttuarpoq.
- Avatangiisit paarinerulernissaat anguniarneqassappat Kalaallit Nunaanni aamma tikkuutit pissusilersuutillu allanngortittariaqarput taamalu silaannaap allanngoriartorneranut ajornartorsiutit aaqqinniarneqarneranut peqataalerluni, Aqqalu Abelsen radioaviisimut oqarpoq.
- Minnerunngitsumik biilivut pivakka, taakku pisiniarfiliartilluta allakkeriviliartillutaluunniit amerlavallaartutigut motorii ingerlatiinnarneqartarput, naalakkersuisunut ilaasortaq oqarpoq. taassuma misissuiffigerusuppaa benzinamik akitsuineq malunnaatilimmilluunniit pillaalluni akiligassiisarnerit pisariaqanngitsumik nukissiuutinik atuineq unikaallatsinneqarsinnaanersoq.
Benzinamik akitsuisinnaaneq aalisartunut piniartunullu eqquissanngitsoq naalakkersuisunut ilaasortaq erseqqissaavoq, taanna tallimangorpat Balimi silaannaap pissusaa pillugu naalagaaffiit qullersaasa ataatsimiinnerannut Kalaallit Nunaata peqataaffigisaanut aallassaaq.