Múte B. Egede: Killeqarfiup nunat attaveqatigiittarnerat killilissanngilaa
Tartupaluk pillugu isumaqatigiissuteqarnermut atatillugu Naalakkersuisut Siulittaasuat Múte B. Egede aamma Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt pisortatigoortumik Canadamut tikeraarput, tassani Kalaallit Nunaata Danmarkillu imminnut ataqatigiinnerat oqaluuserineqarsimalluni.
Tartupaluup avinneqarnissaa pillugu isumaqatigiissuteqaqqaarneq marlunngornermi Ottawami atsiorneqarpoq.
Múte B. Egedep atsioqatigiinnermi tugassiortunik katersortitsinermi pingaartillugu oqaatigaa, siunissamit nunat taakku marluullutik qanimut suleqatigiinnerulissasut.
- Oqaluttuarisaanerput kulturerpullu Canadami Inuillu assigiipput, taamaammat ataqatigiinnerput nukittorsarniarlugu suleqatigiissutaasinnaasunik nutaanik nassaarniarluta suleqatigiinnerput pissusissamisuuginnarpoq. Oqaatigerusuppara, Kalaallit Nunaata Canadallu attaveqatigiittarnerat killeqarfimmit killilerneqassanngimmat. Nunat taaku qanimut attaveqatigiittarnerannut kiisalu Inunnut ilaqutarisatsinnut qanimut attaveqarnerulersitsiinnassaaq, Naalakkersuisut Siulittaasuat oqarpoq.
Canadap Kalaallillu Nunaata imminnut attaveqatigiittarnerat arlaleriarluni oqaloqatigiissutigineqarsimavoq, atsioqatigiittoqarnissaalu sioqqullugu Inuussutissarsiornermut Niuernermullu Naalakkersuisoq Vivian Motzfeldt Torontomi aatsitassat pillugit saqqummersitsinermut PDAC-mut peqataasimavoq, tassani Nunatsiavut Group of Companies-imit aamma Kitikmeot Corporation-imit aallartitat ataatsimeeqatigisimallugit.
Ilasseqatigiilluni ataatsimeeqatigiinneq suleqatigiinnerlu pillugu oqaloqatigiinneq
Múte B. Egede aamma Vivian Motzfeldt ilasseqatigiillutik ataatsimeeqatigaat Canadap General guvernøria Mary Simon, siullersaalluni Inuk-tut taamatut atorfeqartoq, taamaalillunilu tuluit kunngianut nunami aallartitaatut atuuffeqarluni, Nimminersorlutik Oqartussanit tusagassiorfitsigut nalunaaruteqarnermi ilisimatitsissutigineqarpoq.
Ataatsimiinnermi inuiaqatigiit Kalaallit aamma Canadamiut akornanni attaveqaatit qanimut aamma ilaqutariinnermut tunngasut ersersinneqarput, aamma attaveqaatit sakkortusarniarlugit suleqatigiinnerup annertusarnissaanut iliuuserineqarsinnaanersut ataatsimiissutigineqarput.
Naalakkersuisut Siulittaasuat Naalakkersuisorlu Nunavut Naalakkersuisuisa Siulittaasuat P.J. Akeeagok aamma ataatsimeeqatigaat, ataatsimiissutigalugit suleqatigiinnissamut periarfissat annertunerulersinneqarnissaat.
Taassuma saniatigut Naalakkersuisut Siulittaasuat Naalakkersuisorlu Canadami Nunanut allanut Ministeri Mélanie Joly ataatsimeeqatigaat, ataatsimiissutigalugit annertunerusumik niuerneq aamma Canadap Kalaallit Nunaallu akornanni aningaasaliissuteqarsinnaanermut tunngasut, aammalu ilisimasanik avitseqatigiinnissamut periarfissat.