Múte naalagaaffimmik pilersitsinissamut naalakkersuisoqalernissamut piareertoq
Naalakkersuisut siulittaasuata Múte B. Egedep, Naalakkersuisut nutaat saqqummiuppai, nikinnerit arlaliupput, naalakkersuisoqarfillu nutaaq pilersinneqarpoq, taassuma inatsit tunngaviusussamik suliaqarneq aamma naalagaaffinngornissamut aqqutissaq akisussaaffigissavaa. Kim Kielsen Naalakkersuisunut ilaasortanngorpoq.
Múte B. Egedep naalakkersuisoqatigiit nutaat qulingiluanut taarsiullugit qulinik ilaasortaqartut ataasinngornermi saqqummiuppai.
Siumup atorfiit annertuut marlussuit pissarsiarai, Vivian Motzfeldtip nunanut allanut naalakkersuisoqarfiup ataani namminiilivinnissaq akisussaaffigilerpaa, Kim Kielsenillu Piniarnermut Aalisarnermut Naalakkersuisoqarfik akisussaaffigilerpaa. Siumup siulittaasuata Erik Jensenip aningaasaqarnermut naalakkersuisoqarfik akisussaaffigilerpaa, Naaja Nathanielsen kingoraarlugu.
Múte B. Egede (IA) Naalakkersuisut Siulittaasuat
Aningaasaqarnermut Akileraartarnermullu Naalakkersuisoq, Erik Jensen, Siumut .
Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiisitaanermullu Naalakkersuisoq, Naaja H. Nathanielsen, Inuit Ataqatigiit
Naalagaaffinngornissamut Nunanullu allanut Naalakkersuisoq, Vivian Motzfeldt, Siumut
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede
Aalisarnermut Piniarnermullu Naalakkersuisoq, Kim Kielsen, Siumut
Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, Inuit Ataqatigiit
Isumaginninnermut, Ilaqutariinnut, Sulisoqarnermut Nunamullu Namminermut Naalakkersuisoq, Jess Svane, Siumut
Peqqinnissamut Naalakkersuisoq, Agathe Fontain, Inuit Ataqatigiit
Ineqarnermut Attaveqaatersuutinullu Naalakkersuisoq, Hans Peter Poulsen
Naalakkersuisut nutaat qulequttat sisamat ukkatariniarpaat
Naalakkersuisoqatigiit suleqatigiinneranni ilassutit isumaqatigiissummi qulequttat sisamat pingaartumik Naalakkersuisut piffissami tulliuttumi ukkatariniarpaat. Peqqinnissaqarfik, akileraartarnermut aaqqissuusseqqinneq, aatsitassat aamma naalagaaffinngornissaq.
Naalakkersuisut uranimut politikkertik attanniaraat, Múte B. Egedep naqissuserpaa, kisianni aatsitassarsiornermi aningaasaqarnikkut siuariartornissaq pilersinniarlugu periarfissanik nutaanik sulissuteqartoqassaaq. Naalakkersuisuttaaq aatsitassarsiornermut tunngatillugu innuttaasut peqataatinneqarnerunissaat sulissutiginiarpaat.
Vivian Motzfeldtip naalakkersuisoqarfiani namminersorneq pillugu inatsit, inatsit tunngaviusussaq pillugu siunnersuut aamma naalagaaffinngornissamik suliaqarnerup sukkatsisarneqarnissaata qulakkeerneqarnissaa ukkatarineqassapput.
Nunatsinni inuussutissarsiutit pingaarnersaat, aalisarneq, qulequttat ukkatarineqarnerusussat akornanniinngilaq, kisianni qinigaaffiup matuma qaangiutinnginnerani aalisarnermut inatsisissatut siunnersuummik saqqummiussisoqarnissaa anguniarneqarpoq.