Múte: Nunarput atugarissaarfiusoq anguniagaraarput
Innuttaasut akornanni atugarissaarnerunissaq aamma ineriartornerup ingerlanneqarnissaa Naalakkersuisut anguniarniarpaat, Múte B. Egede, Inatsisartuni ataatsimiinnermik ammaanermi oqalugiaammini oqarpoq.
Ukiaanerani ataatsimiinneq tallimanngornermi annertuumik maluginiarneqartumik aallartinneqarpoq, Naalakkersuisunut ilaasortat marluk tunuarput, Kim Kielsenilu Inatsisartut siulittaasuattut atorfimmini taarserneqarpoq. Uissuumminartumik nikittoqarnera tusagassiorfinnit illuatungiliuttuniillu assut maluginiarneqarput.
Tamakku ingerlaneranni Naalakkersuisut siulittaasuat, Múte B. Egede (IA), ammaanermini oqalugiarpoq, tamannalu nalinginnaasumik ammaanermi sammineqarnerusaraluarpoq.
Siulittaasup oqalugiaammini eqqartugai amerlapput, innuttaasullu akornanni atugarissaarneq toqqissisimanerlu Naalakkersuisunut qanoq pingaaruteqartiginersoq aallarniutigaa:
Ilungersunartorpassuit
- Unammilligassaqaqaagut, taamaattorli siunnerfipput angusariaqarparput, tassaasoq: Nunarput atugarissaarfiusoq. Nunarput toqqissisimaffiusoq. Nunarput ineriartorfiusoq.
- Innuttaasut atugarissaarnerulernissaat nunattalu ineriartornissaa anguniarlugu sukataassaagut, Múte B. Egede oqarpoq.
Naalakkersuisut siulittaasuata aamma inuuniarnikkut ajornartorsiutit oqaaseqarfigai:
- Ukiunilu kingullerni meeqqat angerlarsimaffii amerliartorput. Angajoqqaajusut akisussaaffimmik paarsisinnaajunnaaraangata ajoraluartumik meeqqat, meeqqat angerlarsimaffiinut inissinneqartarmata. Tamanna ataatsimoorfigalugu mumisittariaqarparput. Taamaattussaanngilarmi.
Meeqqat allamut inissinneqartarnerat aaqqiissutissaanngilaq
- Meeqqat angerlarsimaffii pilersinneqartussaanngikkaluarput, nunattaaku meerai isumassorneqarlutik sikkerartussat - nunannguarput qalipaasersorlugu, Múte B. Egede oqarpoq.
Angajoqqaat ikiortariallit tapersersorneqarnissaat pingaaruteqarnerarpaa, meeqqat angerlarsimaffimminnit allamut inissinneqartarnerat pinngitsoorniarlugu:
- Meeqqat angerlarsimaffimmiit allamut inissinneqartarnerat aaqqiissutitut isiginagu, angajoqqaat meeqqaminnik isumassuilersinnaanissaat, meeqqap inunngornera sioqqullugu tamaviaarullugu aalluttariaqarparput. Meeqqap toqqissisimanartumut inuunermut appakaassinnaanissaa qulakkeerniarlugu. Siunissarpummi pineqarpoq.
Tamatuma kingorna Naalakkersuisut isumaannik toqqissimanermik atugarissaarnermillu annertunerusumik pilersitseqataasinnaasut, Múte B. Egedep oqaluuserai.
Peqqinnissaqarfik ilinniartitaanerlu ukkataralugit
Assersuutigalugu ilinniartut ineqarfiinik sanaartorneq, peqqinnissaqarfimmi aamma ilinniartitaanermi pitsanngorsaanerit pineqarput:
- Ilinniarnissamut periarfissat amerlapput taamaakkaluartoq aqqutinik nutaanik ujartuiuassaagut. Ilaatigut inuusuttunut immikkut pisariaqartitsisunut naleqqussakkamik ilinniarnermik neqerooruteqalersinnaaneq sulissutigineqarpoq.
Múte B. Egede oqalugiaataa ataasinngornermi suliareqqissaarneqassaaq, tassani Inatsisartut ammaanermi oqalugiaat tunuliaqutigalugu oqallinniarput.