Múte tunngaviusumik inatsisissaq pillugu: Suliap qanoq ingerlanissaa suli piffissalersorneqanngilaq
Tunngaviusumik inatsisissatut siunnersuut persuarsiornertalimmik tunniunneqareernikuuvoq. Suliarli qanoq qaqugulu ingerlateqqinneqassanersoq pillugu Múte Bourup Egede suli erseqqissuliorsinnaanngilaq. Tassa § 37 tunngavigalugu apeqqummut tusagassiorfiilluunniit apeqqutaannut suli erseqqissuliunngilaq.
Sisamanngormat Sermitsiaq.AG-mit oqaluttuaraarput Inatsisartuni ilaasortaq Mariia Simonsen (IA) § 37 naapertorlugu apeqqumminut suli akissutisisimanngitsoq, taanna Naalakkersuisunut apeqquteqarnikuuvoq tunngaviusumik inatsisissatut siunnersuut innuttaasunut agguaanneqassanersoq, tamatumalu saniatigut suliaq qanoq ingerlanneqassanersoq.
Naalakkersuisut siulittaasuat, Múte Bourup Egede (IA) Mariia Simonsen-ip apeqqutaanut suli akissuteqartoqannginnera pillugu ajuusaarpoq:
- Inatsisartut tassaammata inatsit tunngaviusussaq pillugu isumalioqatigiissitap suliakkinneqarneranik aalajangiisuunerat ataqqivarput taamaammallu Naalakkersuisut kisimiillutik isumartillu kisiat naapertorlugu naalakkersuisinnaanngillat suliaq qanoq iluseqartillugu ingerlanneqassanersoq, Múte Bourup Egede nassuiaavoq.
Sulineq Inatsisartut peqatigalugit ingerlanneqassaaq
Bourup Egede taamak tunngavilersuilluni erseqqissaavoq Inatsisartut siulittaasoqarfiat peqatigalugu isumaliutissiissut aallaavigalugu sulineq ilusilersorneqassasoq:
- Inatsisartut sinnerlugit akissuteqarsinnaanngikkaluarlunga, taamaattoq isumaqarpunga isumaliutissiissut inatsisissatullu siunnersuut innuttaasunut paasiuminartumik isummersorfigiuminartumillu ilusilerlugu agguaanneqassappat tamanna pissusissamisuussasoq, taamatuttaaq isumaqarpunga inuiaqatigiinni siammasissumik sukumiisumillu oqallinneq pilersaarusiaalluartumik ingerlanneqassasoq, Naalakkersuisut siulittaasuat oqarpoq itisiliillunilu:
- Angusassaq tassaasariaqarpoq inuiaqatigiinni innuttaasut sapinngisamik pitsaanerpaamik ilisimasaqassuseq aallaavigalugu piffissaq nallerpat nunatta siunissaa pillugu aalajangiisinnaanissaat, Múte Bourup Egede Sermitsiaq.AG-mut erseqqissaavoq.
Ullut tamaasa anguniagaq tikikkiartuaarneqarpoq
Tassa Bourup Egede maannangaaq nikussutiinnarlugu oqarsinnaanngilaq innuttaasunut agguaassassaq qanoq iluseqassanersoq aammalu innuttaasunik oqaloqatiginninneq qanoq iluseqartinneqassanersoq, aatsaallu Naalakkersuisut Inatsisartullu siulittaasoqarfiat ilusilersueqatigeereerpata qanorpiaq sulisoqassanersoq ersarissiumaartoq erseqqissaatigivaa.
Apeqqutigigatsigu qaqugu inuiaqatigiit taasitinneqassanersut maannangaaq missiliorlugu ullulikannersinnaaneraa, Bourup Egede akivoq ulluliinissaq nammineq oqaaseqarfigisinnaanngikkini:
- Aperineqaraangama qaqugu Kalaallit Nunarput namminiilivissanersoq akissutigisarpara ullut tamaasa suliagut sulinittalu imarisai anguniakkatsinnut qanillattuutigisarigut, Múte oqarpoq nangillunilu:
- Inatsisartunut qinersinitta kingorna sulinerput tamarmi tassaavoq alloriarnermut kissaatigisatsinnut ullut tamaasa qanillattorneq, uagut politikkimik suliaqartuusugut innuttaasunut ullulersuinissarput pissusissamisuunngilaq, pissusissamisoorporli tamatta peqatigiilluta aqqutissiuusseqatigiinnissarput taamaalillutalu aalajangerneq qaqugu piumaarnersoq pillugu aalajangeeqatigiinnissarput piffissaq nallerpat piumaarpoq, Múte Bourup Egede nassuiaavoq.