Mútelu aaqqiagiinngissuteqartoqareersoq tusagassiortoq Ilulissani pisunit peqataajunnaarpoq
Ministeriunerup nunatsinni tikeraarnerani tusagassiortoq TV2 sinnerlugu malinnaasoq, Naalakkersuisut siulittaasuallu Múte B. Egedelu aaqqiagiinngissuteqareerluni tikeraartoqarnermi malinnaajunnaassalluni aalajangerpoq.
Ilulissanut angalalluni TV2 sinnerlugu tusagassiiartorneq Phillippa Maigaard Filtenborgimut ippassaq unipiloorpoq.
Taanna namminersortuuvoq TV2-miillu suliakkerneqarsimalluni. Naalakkersuisulli siulittaasuannik aaqqiagiinngissuteqareerluni angalanermi tusagassiinini unitsippaa. Suliakkiisut tamanna akuersaarpaat.
- Aaqqiagiinngissut TV2-p allaaserisaanit kukkunernik imaqartunik aallaaveqarpoq, nutaarsiassaqartitsiviullu tamanna utoqqatsissutigereerpaa. Erseqqissaatigissavara nutaarsiassat kukkuneqartut saqqummiunneqarmata uanga TV2-mut suli attuumassuteqanngilanga, Phillippa Maigaard Filtenborg, namminersortutut tusagassiortuusoq oqaluttuarpoq.
Apereqquneqarsimanngitsoq
- Nutaarsiassaqartitsivik sullitara pissutigalugu ministeriunerup tikeraarnerani apersueqquneqarsimanngilanga, Phillippa Maigaard Filternborg oqarpoq.
TV2-p aallartitaa Sermitsiaq.AG-mut ilisimatitsivoq ministeriunerup tikeraarnerani Naalakkersuisut Siulittaasuat apersorumasimagaluarlugu itigartinneqartarsimallunili, taamatullu tusagassiortunik katersortitsinissamut peqataatinneqarsimanani.
- Taamaattussaasimappat sioqqutsillutik ilisimatitsisinnaagaluarput TV2-mut oqaaseqarniaratik, taava tusagassiorfittut pisinnaatitaaffigut malillugit naammagittaalliornissamut periarfissaqarsimassagaluarpugut. Uannut tunngassuteqanngitsut pillugit aaqqiagiinngissutaasut uanga nammineq tusagassiortutullu peqataaffiginianngilakka, Phillippa Maigaard Filtenborg Sermitsiaq.AG-mut oqarpoq.
Tusagassiortoq pineqanngilaq
Ministeriuneq Mette Frederiksen nunatsinnut ulluni makkunani tikeraarnermini Ilulissaniippoq. Tusagassiortullu tikeraarnermi malinnaanissamut qaaqqusaapput.
Ilulissani tusagassiortunik katersortitsineq Hotel Arcticimi ingerlanneqartussaagaluartoq allanngortillugu umiatsiami pingasunngornermi ingerlanneqarpoq.
Naalakkersuisut Siulittaasuat, Múte B. Egede allakkatigut akissuteqarluni ilisimatitsivoq aaqqiagiinnginneq qinersisoqalernerani TV2-p siulittaasullu akornganni pisimasunit tunngaveqartoq. iupput. Uanili erseqqissaatigaa tusagassiortoq pineqanngitsoq, tusagassiorfilli TV2 pineqartoq.