Mútep Zelenskyj oqaloqatigigaa: - Unnersiutissaavoq
Kalaallit Nunaata nunat killiit Ruslandimut pillaatitut iliuuserisaannut peqataanerat, Ukrainep præsidentiata qujamasuutigigaa, Naalakkersuisut siulittaasuata oqaluttuaraa.
Danmark ullormi kingullermi piffissami ukiup aappaa avillugu sivisussusilimmi nunarsuarmi oqaluuserineqarnerpaat ilaannik tikeraarneqarpoq; tassa Ukrainep præsidentia Volodymyr Zelenskyj.
Ataasinngornermi ullaap tungaani Zelenskyj Københavnimi Christiansborgimut pulaarpoq, tassani ilaatigut arlaleriarluni oqalugiarpoq.
Oqalugiarnerit akornanni præsidentip Naalakkersuisut siulittaasuanik, Múte B. Egedemut (IA) ilassinnippoq, taanna Kalaallit Nunaat sinnerlugu Inatsisartut siulittaasuat Kim Kielsen (S) peqatigalugu Christiansborgimiipput.
- Akiuunneq tapersersorparput
Ukrainep præsidentianik naapitsineq misigisaq annertusoq, Múte B. Egede, Sermitsiaq.AG-mut oqaluttuarpoq:
- Sivikitsumik oqaloqatiginissaanut periarfissaqarpoq, tassani ilasseqatigiippugut.
- Aallaqqaataaniilli kiffaanngissutsimut aamma tamat oqartussaanerannut ilungersuuteqarneq tapersersorlugu ersarissumik oqariartuutigisimallugu oqaluttuaraarput, taamaattumillu Ruslandimut pillaatitut iliuuserineqartunut aallaqqaataaniilli tapersersuisugut. Avammut tunisinerput unitsipparput aamma aalisarneq pillugu isumaqatigiissut taamaatillugu.
- Zelenskyj tungitsinnit tapersersuinermut qujamasuppoq, Múte B. Egede oqarpoq, taassuma Zelenskyjimik naapitsineq unnersiutissaanerarpaa:
- 24. februar 2022-miilli ullut tamangajaasa angut takusarparput, Ukrainellu innuttaasut toqqissisimanissaannut namminerlu nunagisaminni najugaqarsinnaanermut pisinnaatitaaffiannut ilungersuuteqarneq malinnaaffigalugu. Angut naapillugu paasinninnarpoq, Múte B. Egede oqarpoq.
Kalaallit Nunaat iliuuseqarnerussava?
Kalaallit Nunaat Ruslandimut pillaatitut iliuuseqarnermut ilaagaluartoq, assersuutigalugu Ukrainemit qimaasunik tikisitsinikuunngilaq, Savalimmiut Danmarkilu taamaaliornikuusut.
Kalaallit Nunaata Ukrainemut tapersiilluni pillaatitut iliuuserineqartunut ilanngunnermigut iliuuserisai pillugit, Múte B. Egede ima oqarpoq:
- Tapersiinerit aallartissimasavut tapersersorneqarnikuupput. Iliuuserineqarsinnaasut allat pillugit partiit oqaloqatigineqassapput, tassami taama pisoqartillugu iliuusissat suut iliuuserineqassanersut siammasissumik oqaloqatigiissutigineqartussaapput.
Danmarkip timmisartunik malersuutinik F-16-inik 19-inik tunissuteqarneranut atatillugu præsident Zelenskyj Danmarkimiippoq.
Danmarkip Kalaallit Nunaannik illersuinini annikillissanngikkaa naatsorsuuteqartoq
Danskit Ukrainemut sakkussarpassuarnik tunissuteqarnerat danskit illersornissaqarfianut annikillisitsissanersut oqallisaalerpoq.
Apeqqut: Sakkussanik tunissuteqarnerit Kalaallit Nunaata illersorneqarneranut ernumalersitsippat?
- Danmarkip Ukrainemut tapersiinera danskit akisussaaffigaat.
- Kalaallit Nunaannit isigalugu Danmarkip Kalaallit Nunaata oqartussaaffigineqarnerata illersorneqarneranillu atuutsitsinera naatsorsuutigaara, tassuunalu annikillisaasoqannginnissaa naatsorsuutigalugu, Múte B. Egede oqarpoq.
Kalaallit Nunaata Ukraine assigalugu Rusland sanilerineqartoq, tamatumalu ernumanartoqarnera Naalakkersuisut siulittaasuata aamma oqaatigaa.