Naalagaafeqatigiit Thorshavnimi ataatsimiilerput
Politikkikkut ajornartorsiutaasartut pillugit Nunarput, Savalimmiut Danmarkilu ammasumik oqaloqatigiipput
Naalagaaffeqatigiinnerup iluani naalakkersuisut siulittaasui pingasut sisamanngornermi junip 9-ni tallimanngornermilu junip 10-ni Thorshavnimi ataatsimeeqatigiissapput. Lars Løkke Rasmussen, Kuupik Kleist kiisalu Kaj Leo Holm Johannesen politikkikkut ataatsimoorussaminnik anguniangaat, nunat taakku pingasut politikkikkut ajornartorsiutigisartagaat kiisalu isumaqatigiinngissutigisinnaasaat ammasumik eqqartorneqassallutik.
Naalakkersuisut siulittaasui pingasut ullormut eqqatugassaat suunersut suli pisortatigoortumik saqqummiunneqanngillat, issittorli pillugu tamarmik suleriaasissaat oqaluuserineqarumaarpoq. Tassani Nuummi Issittumi Siunnersuisoqatigiit majimi ataatsimiinnerat pingaarnersiorneqarumaarpoq, Issittumilu Sakkutooqarfissap sumut inissinneqarnissaa aamma eqqartorneqassalluni. Tamatuma saniatigut Aningaasaqarnermik Nakkutilliisoqarfik - Finanstilsynet - pillugu oqaloqatigiittoqassamaarpoq.
Danskit EU-mi siulittaasunngornissaat aamma qaqilerneqassamaaneqarunarpoq. Uagutsinnullu tunngatillugu Nuummi pineqaatissinneqarsimasunik isertitsivissamut aningaasartuutissanut ajornartorsiutaasut aamma sammineqarumaarput. Isertitsivissammi inissiffissaa saviminernik eqqaavissuup eqqaa nunagissarnissaa Kommuneqarfik Sermersuup aalajangiussimasaa danskit naalakkersuisuisa akilerumanngisaat aamma eqqqartorneqartussaassalluni. Ajornartorsiut alla eqqartorneqartussaq tassaassagunarpoq CIA-p tigusanik timmisartuussisarsimanerinik pasilliut.
Aamma naalagaafeqatigiinnerup iluani isummerfigisassaq nutaanerpaaq tassaavoq issittumi uuliasiornissami immamilu itisuumi uuliasiornissami assigiiaartumik periuseqalernissaq.
Ataatsimiinnissap pissarsiaqaataalluarnissaa ministeriunerup Lars Løkke Rasmussenip neriuutigaa:
- Savalimmiuni ataatsimiinnissarput qilanaareqaara, tassanimi lagmandi, naalakkersuisut siulittaasuat uangalu tamatta politikkikkut ataatsimoorussinnaasatsinnik ammasumik oqaloqatigiilluassutigiumaarunaratsigu. Naalagaaffeqatigiinnerummi iluani pissarsiaqaataalluartumik suleqatigiinnissaq Danmarkimi naalakkersuisutta pingaartittupilussuuaat, taama Lars Løkke Rasmussen ataatsimiinnissaq pillugu oqaaseqarpoq.