- Naalagaaffeqartigiinni tapersersoqatigiippugut
Naalakkersuisut siulittaasuata Aleqa Hammondip tusagassiorfinnut nalunaarutikkut oqaluttuaraa Kalaallit Nunaata Issittumi Siunnersuisoqatigiinni peqataanissaa tapersersorlugu, mattussinermilli apeqqutit akiumanngilai
Naalakkersuisut siulittaasuata politikerinit innuttaasunillu isorineqarnerujussua sapaatip akunnerata aappassaani ingerlaqqikkaluartoq tusagassiorfinnut nalunaarummi oqaatsit pitsaasuinnaat atorneqarput, tassani Aleqa Hammondip mattussinermik isorinninneq isummerfigiumanagu.
Tusagassiorfinnut nalunaarummi ilaatigut erseqqissarpaa Kalaallit Nunaata Issittumi Siunnersuisoqatigiinni peqataanissaanik qallunaat nunanut allanut ministeriannit Villy Søvndalimit savalimmiunilu naalakkersuisut siulittaasuannit Kaj Leo Johannesenimit tapersersorneqarluni.
- Uagutsinnut pingaaruteqarpoq erseqqissassallugu Issittumi Siunnersuisoqatigiinni isumaqatigiissutigigatsigu sulinitsinni inuit Issittumi najugallit pingaarnerpaatinneqassasut, taava tamanna aamma uagutsinnut isumaqarpoq Danmarkimit, Kalaallit Nunaannit Savalimmiunillu sinniisut Issittumi Siunnersuisoqatigiinni sulinermi naligiissutut peqataasinnaasariaqartugut, soorlu taamaassimasoq svenskit siulittaasuuffimmik tigusinerisa tungaanut. Uagutinnut pingaaruteqartorujussuuvoq erseqqissassallugu akuerineqarsinnaanngitsoq Kalaallit Nunaat Savalimmiullu, issittumi territoriap 20 procentianik tigumminnittut, Issittumi Siunnersuisoqatigiinni isumaqatigiinniarnerit immikkoortuini tamani toqqaannartumik peqataasinnaajunnaartinneqarnerput, Naalakkersuisut siulittaasuat naalagaaffeqatigiinni politikerit pingasut sinnerlugit tusagassiorfinnut nalunaarummi allappoq.
Aleqa Hammondip, Villy Søvndalip Kaj Leo Johannesenillum neriuutigaat canadamiut siulittaasuuffimmik tigumminnittut peqatigalugit ´ajornartorsiummut aaqqiissummik naammaginartumik´ nassaarsinnaassallutik.
Atuaruk "Kalaallit Nunaata mattussinera Danmarkip ajuusaarutigaa"
Atuaruk "Mattussineq pillugu apeqqutit Aleqap akiumanngilai"
Apeqqutit akiumanngilai
Aleqa Hammond arlaleriarluta saaffigisaraluarlugu apersorneqarnissaminullu akuersereeraluartoq Sermitsiaq.AG-p Naalakkersuisut siulittaasuat suli pissarsiarisinnaanngilaa, sapaatip akunnerani kingullermi sisamanngormat nunani avannarlerni ministerinik naapitsereernerata kingorna, ilaatigut mattussinerminut sammineqaqisumut tapersersortissarsiorluni.
Tassami ataatsimiinneq qanoq ingerlasimava? Kiap tapersersorusussimavaa? Kina qanoq oqarpa? Aamma Aleqa Hammond Issittumi Siunnersuisoqatigiinni ministerit ataatsimiinnerannik mattussinerminut atatillugu peqqissimiva?