naalagaaffeqatigiinneq
Naalagaaffeqatigiinneq nutaaliaanerusoq kissaatigineqarpoq
Naalakkersuisut siulittaasuata Aleqa Hammondip apeqquserpaa ilumut naalagaaffeqatigiinneq pitsaasumik ingerlanneqarnersoq
- Uagut savalimmiormiullu aningaasatigut napatissinnaalerutta aatsaat naligiinneq pilissaaq.
Naalakkersuisut siulittaasuat Aleqa Hammond Siumumeersoq oqarpoq.
Naalagaaffeqatigiinnerup Folketingimi oqallisigineqarnerani ilaliullugu aviisimi Berlingskemi kronikkiliamini ilaatigut oqarpoq. Oqallittoqarneralu nuannaarutigaa:
- Ulloq taanna Kalaallit Nunaat danskit tapiissutigisartagaannik pisartagaqarunnaarpata nunarput Danmarkilu aniguinermik misigisussaasut qularutiginngilara. Tamanna anguniarlugu aatsitassarsiornerit aallartisarneqarnialerput, tamakkuninngalu suliaqarneq avatangiisinik illersornissakkullu tunngatillugu isumannanngitsumik ingerlanneqassallutik, Aleqa Hammond kronikkiliamini ilaatigut oqarpoq. Naalagaaffeqatigiinnerlu nalilersorlugu:
- Naalagaaffeqatigiinnerup angunianngilaa kalaallit savalimmiormiullu qallunaanngortinneqarnissaat. Piffissaq taanna qaangiutereerpoq. Naalagaaffeqatigiinnermi nutaaliaasumi isumaqatigiissutigineqarsinnaasut isumaqatigiissutigineqarsinnaanngitsullu oqaloqatigiissutigineqarsinnaasariaqarput. Statsministerilu isumaqatigiissutigisinnaanngisagut eqqartorpakka. Qujanartumilli assigiinngitsorpassuartigut isumaqatigiissuteqarsinnaavugut, aamma allanik maannakkut nalusatsinnik suleqatigiissuteqarsinnaavugut. Taamaattumik nuannaarutissaavoq nunarput Danmarkilu inuussutissarsiutit pillugit suleqatigiinnialermata. Pingaaruteqarpormi Naalagaaffeqatigiinneq ineriartortittuassallugu ullutsinnullu tulluunnerusunngortissallugu.