Naalagaaffik tunniutiinnartoq: Meeqqat misileraataasimasut taarsiiffigitissapput
Danskit naalagaaffiat meeqqat ukiut 70-it matuma siornata missaani misileraatitut Danmarkiliartinneqarsimasut sinnerisa arfiniliusut taarsiiffigitinneqarnissaat pillugu isumaqatigiissuteqarsimavoq.
Danmarkimi naalakkersuisut meeqqat 22-t 1951-imi misileraatitut Danmarkiliartinneqarsimasut sinnerisa taarsiiffigineqarnissaat siorna maajip qaammataani itigartitsissutigaat.
Taamaammat maanna suli inuusut arfiniliusut 2021-mi decembarip qaammataani aalajangerput naalagaaffik eqqartuussivimmut sassartinniarlugu, tassani Kalaallit Nunaanni aallartinneqarnerup ilaatigut ilaqutaasut nammineq inuttut ilaqutariittullu inuuneqarsinnaatitaanerannik innarliisoqarsimasoq tunngavilersuutigineqarluni.
Inuit arfinillit sinneruttut tamarmik immikkut naalagaaffiup isumaqatigiissuteqarneratigut maanna 250.000 koruuninik taarsiiffigitittussanngortut, Danmarkimi Social,- og Ædreministeeriaqarfik nittartakkamigut ilisimatitsivoq.
- Meeqqanik nuussisimaneq Kalaallit Nunaata Danmarkillu ataatsimut oqaluttuassataanni nuanngitsut ilagaat, tamannalu isiginngitsuusaarsinnaanngilarput. Taamanikkut pisimasup malitsigisaanik meeqqat oqaatsitik, kulturikkut kinaassusertik ilaquttaminnullu attaveqarnertik annaasimavaat. Taamaammat ministeriuneqarfiup utoqatsissuteqarnera inissiminiippoq, sinneruttullu arfinillit maanna naalagaaffimmit taarsiiffigitittussanngornerat nuannaarutigaara, Social,- og ældreministeri Astrdik Krag oqarpoq.
Meeqqat sumiginnarneqarsimanerat pillugu ministeriuneq Mette Frederiksen 2020-mi decembarip qaammataani utoqqatserpoq, taamanikkulli aningaasanik malitseqartitsisoqarani. Misileraasimanermillu sinneruttut arfinilli maanna 250.000 koruuninik taarsiiffigitittussanngormata suliaq naammaassineqarluni.
Misileraasimaneq:
1951-imi kalaallit meerartaat 22-t isumaginninnermi mileraanermut atatillugu Danmarkiliartikkallarneqarsimapput. Siunertaasimapput, danskisut tunuliaqutaqalersinneqarnissaat oqaaseqartilerneqarnissaallu kiisalu pitsaanerusumik inuuneqartinneqalernissaat. Misileraanerulli ingerlanerani aalajangiunneqarsimavoq, meeqqat Kalaallit Nunaannut utertinneqarlutik Kalaallit Nunaata ineriartortinneqarneranut siuttuutinneqarnissaatd.