Naalagaaffinngornissamut aarlerisaarisoq: - Naalagaaffimmit pissaaneqarnerusumit tiguarneqassaagut

Upernaaq Kalaallit Nunaata namminiilivinnissaanut tunngaviusumik inatsisissatut siunnersuut Inatsit tunngaviusussaq pillugu Isumalioqatigiissitanit tunniunneqarpoq, namminiilivinnissarlu politikikkut oqallinnerni amerlasuuni ilanngunneqartarpoq.

Pituttorsimanngitsumik naalagaaffimmik suleqateqarneq, naalagaaffinngornissamut aqqutissatut aamma piffissami sivisuumi oqallisigineqarnikuuvoq.

Kisianni nunatta namminiilivilluni naalagaaffinngornissaannut piffissami matumani nunani tamalaani pissutsit najummatsernarpallaarput, naalagaaffinnillu suleqateqarneq pitsaasumik kinguneqarsinnaanngilaq. Taarsiullugu Namminersorneq pillugu inatsimmi periarfissat atorluarneqartariaqarput.

IA-mi aamma ICC-mi siulittaasuusimasoq, Aqqaluk Lynge taama isumaqarpoq. Kalaallit Nunaat namminiilivissimasoq piffissami matumani nunarsuarmi inuiaqatigiinnit akuerineqarnavianngitsoq, tusagassiorfimmi Altinget Arktisimi oqallinnermi ilanngutassiami taama oqarpoq.

- Nunarsuarmi pissutsit nalunarput

- Naalagaaffinngorneq nunarujussuarmi innuttaasut 56.000-nut aqqutissaanngilaq. Naalagaaffeqatigiinnerup periarfissai attatinngikkutsigit pissaaneqarnerusumit tiguarneqassaagut.

- Namminersorneq pillugu inatsimmik aaqqiissutip inuiattut politikikkut namminersorsinnaasutut akuerisaanerput pitsaasuuvoq, Aqqaluk Lynge, Sermitsiaq.AG-mut oqarpoq.

Politikeriusimasup nunatta namminersornerulernissaanut ukiorpassuarni ilungersuuteqartut ilagisimavaat, kisianni ullumikkut silatusaaqqusivoq, Sermitsisaq.AG-mut taama nassuiaavoq.

- Allarpassuit assigalugit namminiilivinnissarput takorluugaraara, kisianni maanna pissutsinik nunarsuarmi nalunarsititsipput.

Bruxellesimulluunniit apereqqaartariaqanngitsugut

Ukrainemi sorsuttoqarnerani aamma Ruslandip Issittumi sakkutuulersuineruneratigut sillimaniarnikkut ilungersunartumik inissisimasoqalerneranut Aqqaluk Lynge innersuussivoq. Tamatuma saniatigut Donald Trumpip 2019-imi pisiumalluni neqerooruteqarnera takutippaa, Amerikamiut Kalaallit Nunaannut annertuumik suli soqutigisaqartut, Trumpilu piffissap sivikitsup ingerlanerani præsidentinngoqqissinnaavoq.

Taarsiullugu Namminersorneq pillugu inatsimmi periarfissat atorluarneqartariaqarput, Aqqaluk Lynge kaammattuivoq:

- Namminersorneq pillugu inatsimmi suliassaqarfiit allattorsimasut tigugutsigit, taava tamakkissavavut. Nammineernerunissamut periarfissat amerlapput, EU-mulluunniit ilaasortaanngilagut. EU-mummi ilaasortat Bruxellesimut akuersissummik piumaqqaartussaapput.

- Taamaalilluta politikikkut namminiivippugut, Namminersorneq pillugu inatsit tamakkiisumik atoraanni tamarmik imarai.

Siulittaasuusimasup partiitoqqamini IA-mi maanna naalakkersuisoqatigiinnik aqutsisut, namminiilivinnissamut suliniuteqarnermut taarsiullugu innuttaasut atugaat naligiinnginnerup appartinneqarneratigut pitsanngorsarnissaat ukkattariaqarai isumaqarpoq, aningaasaqarnermillu ataavartumik pilersitsillutik:

Suleqatigiinnissamut periarfissaqarluartoq

- Kalaallit Nunaanni naligiinnginneq annertoorujussuuvoq. Pissakilliortoqarpoq, ilinniarsimasut ilinniarsimanngitsullu akornanni imminnut ungasittorujussuarmik inissisimasoqarpoq. Apeqqutit taakku Inuit Ataqatigiit sammisariaqarpaat, inuiaqatigiinnillu imminut napatissinnaasunik pilersitsillutik, Aqqaluk Lynge oqarpoq.

Aammattaaq Kalaallit Nunaata Danmarkimut attaveqarnerminut pitsanngortitsinermigut periarfissarpassuaqarnerarpaa, assersuutigalugu silap pissusiata allanngoriartorneranut akiuineq eqqarsaatigalugu.

- Danmarkip pitsaasumik suleqatiginissaanut periarfissaqarluarluta isumaqarpunga, assersuutigalugu silap pissusiata allanngoriartornerani ajornartoornerup akiorneqarniarnera eqqarsaatigalugu.

- Danmarkimit aningaasanik imaluunniit iliuuseqarnissamut ilisimasanik ilisarisimaneqaatigisaminik piareersimasoqanngilaq. Sooruna periarfissat taakku atunngilagut? Danmark Kalaallit Nunaallu iluamik oqaloqatigiinnginnerat pissutaavoq, Aqqaluk Lynge oqarpoq.