Naalagaaffiup isertortumik paasiniaasui: Issittoq Ruslandimit pingaartinneqarnerulersoq

Naak Ukrainemi sorsuunnermi Rusland annertuunik annaasaqaraluartoq, taamaattoq Ruslandip Issittumi anguniagai sumininnguamilluunniit allanngornatik akerlianik annertuseriarput.

Tamanna Issittup Ruslandimut sillimaniarnermi politikikkut, sakkutooqarnikkut aningaasaqarnikkullu pingaarnerutinneqalerneranik patsiseqarpoq – tamanna russit isaannit isigalugu aarlerinartorsiortinneqarnerup aningaasaqarnikkullu Ruslandimik tatisinermik patsiseqarpoq.

Taamma Illersornissaqarfiup isertortumik paasiniaasartui misissueqqissaarnermi nutaami allapput.

Ruslandi Issittumi marlunnik pingaarnertut anguniagaqartoq, paasiniaasarfik nassuiaavoq. Siullertut russit isumaat naapertorlugu avannaannit USA-mit NATO-millu aarlerinartorsiortinneqarnermut illersornissaq pillugu. Aappaattullu pinngortitami pisuussutinik Issittumilu aningaasaqarnikkut periarfissanik allanik iluaquteqarnissaq pillugu.

Isumannaallisaanermi politiki allanngorarnerulersoq

Ruslandip nunanik killernik saqitsaassuteqarnermi Issittumut anngutinnginnissaa piumaneruaa, Ruslandilli periutsiminik aporaannerusunngortitsilluni allannguisinnaasoq, isertortumik paasiniaasartut naliliipput.

- Ruslandip nunallu killit sakkutooqarnikkut annertusaanerat pissutigalugu, taamatullu aamma russit paasinninnerat malillugu USA-mit NATO-millu annertusiartortumik navianartorsiortinneqalerneq pissutigalugu, nunarsuup immikkoortuani tamaani isumannaallisaanermi politikikkut pissutsit allanngorarnerulerput.

Ruslandi issittumi nunanut allanut pissusilersuutiminik sakkortunerulersitsissappat, Kunngeqarfik Danmarkimut sunniiniarnernik russit iliuusaat aamma amerlanerulissasut, paasiniaasartut naliliipput:

- Rusland Danmarkip, Savalimmiut Kalaallillu Nunaata akornanni avissaartuutsitsiniarnermik ingerlatsillunilu Issittumi nammineq anguniakkaminik annertusaaniarluni, nunat issittumiittut killiit isumaqatigiinnginnerannik atorluaaniassaaq. Rusland assersuutigalugu nunat killiit Issittumi sakkutuulersornermik ingerlatsinerarlugit avatangiisinillu nunarsuullu immikkoortuani nunap inoqqaavinik aseruineralugit oqariartuutinik siaruartersinnaasoq, Illersornissaqarfiup isertortumik paasiniaasartui allapput.

Sakkutooqarnikkut pisinnaasat sorsuunnermit kalluarneqanngitsut

Rusland Issittumi sakkutooqarnikkut nukittuumik inissisimasoq, Ukrainemilu sorsunnermi tamanna annertunerusumik allanngortinneqanngitsoq, paasiniaasartut ilanngullugu allapput:

- Assersuutigalugu Rusland suli aqqartartunik qaartartorsuarnik igeriuttakkanik useqartut, umiarsuit sorsuutit timmisartullu qaartartorsuarnik usillit atorlugit nakkutilliinernik ingerlatsivoq. Sorsuunnerulli malitsigisaanik Rusland piginnaasalinnik sulisussaqarniarnermigut annertusiartortumik ajornartorsiuteqarpoq.

Russit sorsuutaannut ilaavoq MiG-31K, timmisartup sorsuutip MiG-31-p nutaartaa, taannalu qaartartumik igeriuttakkamik sukkasoorujussuarmik Kinzhal-missilimik igeriussisinnaavoq.

- Timmisartoq sorsuut taanna Ruslandip issittortaani timmisartoqarfimmit sivikitsuinnarmik periarfissaqarluni Issittup Imartaani, Atlantikup avannaani kitaamiut umiarsuaannik kiisalu Kalaallit Nunaanni saassutassanik saassussisinnaavoq.

Misissueqqissaarneq tamakkiisoq uani atuaruk: Udsyn