Naalagaaffiup sinniisuanut suliassaq nutaaq tunniunneqalersoq
Ataatassarsiuussinerit meeqqanullu akiliutit pillugit suliat Naalagaaffiup sinniisuanit suliarineqartalerpata, danskit naalagaaffianut ukiumut millioninik akeqassaaq.
![Aaja Chemnitz, IA-mit folketingimut ilaasortaq](https://image.sermitsiaq.ag/175628.webp?imageId=175628&width=960&height=518&format=jpg)
Kalaallit Nunaanni eqqartuussiviit aammalu Kalaallit Nunaanni Politiit ataatassarsiuussinerit meeqqanullu akiliutit pillugit sulianik Naalagaaffiup sinniisuanut tunniussinissaannut atatillugu, danskit naalagaaffiat ukiumut 1 millionit koruuninik aningaasartuuteqarnerulissasoq, Aaja Chemnitzimut IA-mit folketingimut ilaasortamut, akissummi erserpoq.
- Sulianik ingerlatitseqqiinerit Naalagaaffiup sinniisuanut ataavartumik aningaasartuuteqarnerulerneranik malitseqassaaq, sulianik taakkuninnga isumaginninnermut ukiumut 2,8 millionit koruuninik aningaasartuuteqartassammata. Tamanna ilutigalugu sulianik ingerlatitseqqiinerit Kalaallit Nunaata eqqartuussiviinut ataavartumik 1 millionit koruuninik aningaasartuuteqarnerulernerinik malitseqassaaq, Kalaallit Nunaatalu Politiivinut ataavartumik 0,8 millionit koruuninik aningaasartuuteqarnerulernerinik malitseqassalluni, isumaginninnermut ineqarnermullu ministeri, Pernille Rosenkrantz-Theil, Aaja Chemnitzimut akissummini paasissutissiivoq.
Peqqutissaqanngitsumik ernumaneq
Suliassaqarfimmi inatsimmik atuutsitsilernissamut atatillugu isumalluutissaaleqinissaq, politikerip IA-meersup ernummatigaa.
Taamaattorli isumaginninnermut ineqarnermullu ministerip aalajangersumik oqaatigaa, "atuutsitsilernissamut isumalluutit tungaatigut kingunissat eqqarsaatigineqarsimasut".