Naalakkersuinermik suliaqartut sakkortuumik nakuusernerit toqutsinerillu amerlanerujussuat pillugu: Ajorluinnarpoq
Ileqqorissaarneq ajalusoortoq? Saniatigut sakkortuumik pinerlunnerit nunami atugaasut politiit naalakkersuinermillu suliaqartut nuanniitsunik misillerfigisarpaat: - Qinikkat sioorasaarneqartarput, politiillu akerartorneqartarlutik, nunatsinni naalakkersuinikkut misilittagaqarnerpaaq oqarpoq.
Ilaannikkut qinikkat eqqortumik oqaluttarput. Taamaattoqartarpoq qulequttat inuiaqatigiinni tamani annernartut misigissuseqarfioqisullu sammineqaraangata: Kamanneq, annilaanganeq, soriarsinnaannginnerlu. Aammali pissutsit pillugit annertuumik ernumasoqarluni.
Tamanna Inatsisartuni pivoq inuiaqatigiinni sakkortuumik pinerlunneq – pineqaatisseeriaatsillu sakkortunerunissaannik piumasaqarneq – oqaluuserineqarmata.
Aviisi AG taama allappoq.
Qinikkani angajullersaasoq Hans Enoksen (N) naalakkersuinikkut sulinermini innuttaasorpassuarnut attaveqartarpoq, inuinnaallu akornanni toqqissisimannginnerujartorneq misigisimavaa.
- Pinerluutit sakkortusiartuinnartut tusartarpavut, aamma isumaqanngitsumik saassussinerit, nakuuserneq ima ilungersunartigaluni, pinerliivigineqartut ilaat nakorsanit Københavnimi Rigshospitalimut nassiunneqartariaqartarlutik.
Naakkittaannerunerup aamma naalakkersuinermik suliallit eqqorpai.
- Ullumikkut qangaaniit allaanerusumik inooriaaseqarpugut. Inoqatinut ataqqinninneq annikinnerujussuanngorsimavoq. Ajoraluartumik. Naalakkersuinermik suliaqarnermi aamma sioorasaarisoqartarpoq, allaat toqutsinissamik sioorasaarisoqartarluni, inuiaqatigiinnut sullissineq peqqutigalugu. Taamatut inissisimaneq akuerisinnaanatigulu akuerissanngilarput. Sakkortunerusunik pineqaatissiisariaqarpugut, Hans Enoksen oqarpoq.
Kisitsisit aamma pissutsit aarlerinarnerannut takussutissaapput:
- Inoqatinut ulorianaatilimmik pinerlunnerit amerlasuupilussuupput. Assersuutigalugu nakuusertoqarneranik nalunaarnerit Danmarkimit sisamariaammik amerlanerupput, quleriaammillu Savalimmiuniit amerlanerullutik, Demokraatit oqaaseqartuat Bjørk Lange Olsen oqarpoq, Inatsisartuni – nammineq oqarnera naapertorlugu – sakkukippallaamik pineqaatissiisarnermik oqallinnermik aallarniigami.
Siumup oqaaseqartua Kuno Fencker oqaluttarfimmiit ilaliivoq kisitsisinik suli ajornerusunik saqqumiilluni:
- Toqutsinerit amerlassusaat pineqartillugu nunarput normu 40-voq – nunarsuarmi tamarmi. Israel normu 60-iulluni, Kina 207-iulluni Danmarkilu normu 186-iulluni. Tamanna ajorluinnarpoq.
Aviisimi AG-mi atuarnerusinnaavutit. Aviisi uani pissarsiarisinnaavat:
