isumaqatiginninniarnerit
Naalakkersuisooqatigiit illuat qajannartoq suli napavoq
IA isumaqarpoq aningaasanut inatsisissap suliarinerani pissanganartorsiorfioqisumi naalakkersuisooqatigiit isariaannaassimasut. Eqqissiviilliorneq qaangiuppoq qaleralinnulli akitsuut sammineqalerpat aallarteqqeriaannaalluni
Naalakkersuisooqatigiit illuat neeqquluppoq. Partiit pingasut akunnerminni avataanilu oqqapput Anda Uldumip siunnersuutaa pillugu isummat aporaattareranni.
Maannakkulli qatsorsimalerpoq. Aningaasanut inatsisissap ilaa isumaqatigiissutigineqareermat illumi eqqissineqaqqilerpoq.
Illuatungiliuttulli isumaqatigiinniarnerni Siumup, Demokraatit Atassutillu akornanni ingerlanneqartumi annerusumik minnerusumilluunniit illuartinneqartutut misigisimapput.
- Sapaatit akunnerini kingullerni marlussunni partiit naalakkersuisooqatigiit akunnerminni nuliarsarlutik qitinnerat ungasianiit malinnaavigisarput aningaasanut inatsissamut tunngaannarani naalakkersuisooqatigiit atasinnaassusaannut aamma tunngavoq, IA-mi aningaasaqarnikkut oqaaseqartartoq Naaja Nathanielsen oqarpoq.
Nangipporlu:
- Takuarput siunnersuut Anda Uldumimik ataatsimeeqateqarnitsinni saqqummiunneqartoq tassaanngitsoq maannakkut partiit naalakkersuisooqatigiit akornanni naaperiaanertut avammut saqqummiunneqartoq.
Allaaserineqartoq AG-mi sapaatip akunnerani matumani saqqummersumi atuarneqarsinnaavoq. Aviisi ataani pisiariuk: