Naalakkersuisoq akiuussusersuineq pillugu: Pinngitsaaliisoqassanngilaq
Naalakkersuisut amerlanerusut akiuussusersorneqarnissaat siunertaralugu paasissutissiinerit aallartissallugit aalajangerput. Tuniluunerup appasinnissaa, isorliunerusut illersorneqarnissaat inuiaqatigiinnilu pingaarutilinni atorfillit illersorneqarnissaat ukkatarineqassaaq.
Naammassilluni akiuussusersorneqarsimanissamut paasissutissiinerit oqartussaniit aallartinneqangajalerput. Amerlanerusut akiuussusersorneqalernissaata tungaanut paasissutissiinerup ingerlanneqarnissaa, Peqqissutsimut naalakkersuisup naatsorsuutigaa.
- Paasititsiniaaneq iluaqutaanngippat, taava nalilersueqqissaagut qanoq isilluta amerlanerusut akiuussusersorneqarnissaanut. Massakkut kaammattuutigaarput kapitinneqanngikkunik kapitikkiartornissaat, Kirsten L. Fencker Sermitsiaq.AG-imut oqarpoq.
Innuttaasut pinngitsaalisamik kapitinnissaat Kiista Fenckerip kissaatiginngilaa.
- Eqqartorneqarnikuunngilaq aamma taamaasiortoqarnavianngilaq, taanna naqissusiivoq.
- Tamakkiisumik kapitinneq illersuutaavoq perululinnginnissamut aammalu tamakkiisumik kapitinnikut tunillaaqqissinnaanerat minnerujussuuvoq akiuussutissamik kapitinneqanngitsut sanilliullugit. Taamaammat amerlanerpaat akiuussusersorneqarnissaat pingaaruteqarpoq. Killilersuivugut nunaqarfiit illoqarfiillu avinngarusimasut illersorniarlugit, Peqqissutsimut Naalakkersuisoq oqarpoq.
Killilersuutit qasukkarneqarnavianngillat
Danmarkimi naammassillutik akiuussusersorneqarsimasut 80 procentit sinneqalersimagaluartut killilersuutit qasukkarneqarneq ajorput. Maannami Danmarkimi imerniartarfiit diskotekillu matuneqarnissaat, neriniartarfinni qanermut assiaquteqarnissaq aalajangiunneqarpoq. Taassuma saniatigut julefrokostit unitseqquneqarput inuillu angerlarsimaffimminni sulisinnaagunik sulisalernissaat kaammattuutigineqarpoq.
Inuiaqatigiinni pingaarutilinni atorfillit illersorumallugit Nunatsinni killilersuisoqartoq, Peqqissutsimut Naalakkersuisup naqissuserpaa.
- Siullertut coronap siaruaanerani minnerpaaffissaminiitsinniarlugu killilersuutit suli pisariaqarput. Peqqinnissaqarfik artorsareertoq artukkinnginnissaa anguniarlugu, taavalu inuiaqatigiinni pingaarutilinni atorfillit soorlu timmisartortartut, politiit, peqqinnisaqarfimmi sulisut angallassisut napparsimalinnginnissaat killilersimaarniarlugu, Kirsten L. Fencker oqarpoq.
Killilersuutit pilersinniarneqaleraangata ammaasinerunissamik innersuussuteqaleraangata oqartussat nalilersuiuartut taassuma aamma oqaluttuaraa. Coronap ineriartornera nalunartuaannarmat qaqugu killilersuinerit qasukkaaminissaat oqaatigisinnaanngikkallarpaa.
- Misilittagarilikkagut aamma aallaavigisarpagut. Inuiaqatigiit suleqatigineqanngippata siammatsaaliineq ajornakusoorsinnaavoq. Illoqarfinnut nunaqarfinnullu coronap apuunnginnissaa anguniarlugu angallannernut killilersuivugut. Taavalu nalunngilarput corona katersuuffiusuni tuniluuttartoq taamaattumik tamakkiisumik kapitinnissaq pisariaqarluinnarpoq, Peqqissutsimut Naalakkersuisoq nassuiaavoq.
Tamakkiisumik coronamut akiuussusersorneqarsimasut maanna 67 procentiupput, inuiaqatigiillu 71 procentiisa siullermeerlutik akiuussusersorneqarsimallutik. Akiuussusersuinissamut paasissutissat uani takukkit.