Naalakkersuisoq nipisaat aaqqiagiinngissutaanerat pillugu: Inissisimaffik attanneqarsinnaanngilaq
KNAPK-p Royal Greenlandillu nipisanniarnissaq maannamut kinguartinneqarsimasoq pillugu suliami isumaqatiginninniarnerat Naalakkersuisunit malinnaaffigineqarpoq.
![Naalakkersuisoq nipisaat aaqqiagiinngissutaanerat pillugu: Inissisimaffik attanneqarsinnaanngilaq](https://image.sermitsiaq.ag/652520.webp?imageId=652520&width=960&height=512&format=jpg)
Illuatungeriit nipisaat suaasa tunineqarneranni akigitinneqarniartoq isumaqatigiinngissutigilluinnarpaat, taamaammallu aalisarneq suli aallartinneqarsimanngilaq. Ileqquugaluarpoq aalisarnerup apriilip aallaqqaataani aallartinneqartarnera.
Aalisartut piniartullu kattuffiannit KNAPK-mit aalisakkeriviutileqatigiiffimmut Namminersorlutik Oqartussanit pigineqartumut Royal Greenlandimut tunniutiinnarusuttoqanngilaq. KNAPK-mit oqaatigineqarsimavoq, aalisarneq aallartinneqassappat Royal Greenland kiilumut annertunerusumik akiliuteqartariaqartoq.
Aalisarnermut naalakkersuisunngoqqammersup Karl Tobiassenip (S) taamatut inissisimasoqarnera attanneqarsinnaanngitsoq oqaatigaa, peqatigitilluguli aamma oqaatigalugu Naalakkersuisut maannakkorpiaq isumaqatiginninniarnermut akuliunnianngitsut:
- Sapaatip akunnerini arlaqalersuni attanneqarsinnaanngitsumik inissisimasoqarpoq, arnarluit suaannik tunisisinnaanasi. KNAPK-mi Royal Greenlandimik pitsaasunik isumaqatigiissuteqarsimasuuppat, nipisat suaannik maannakkut aalisarluaraluarpusi, suaat akiisa qanoq innerinik eqqasuuteqarasi isumakuluuteqarasilu, Karl Tobiassen tusagassiorfitsigut nalunaaruteqarnermi oqarpoq, nangillunilu:
Illuatungeriit paasisinnaalluarai
- Neriuutigaara arnarluit suaasa akiinik isumaqatiginninniarneq piaartumik naammassineqassasoq, isumaqatiginninniartunut tamanut naammaginartumik. Pissutsit maannakkut taamaakkallartillugit Naalakkersuisut isumaqatiginninniartunut akuliukkusunngillat. Taamaattoq illuatungeriit noqqaassuteqarlutillu tunniussaqarusunnginnerat paasisinnaalluarpakka.
Sermitsiaq.AG-mit Naalakkersuisut Siulittaasuat Múte B. Egede (IA) apersorusunneqarsimagaluarpoq, Namminersorlutik Oqartussat ingerlatseqatigiiffiutaat oqartussaaffiisa ataaniimmata.
Namminersorlutilli Oqartussanit ilisimatitsissutigineqarsimavoq Naalakkersuisut siulittaasuat maannakkut apersorneqarnissamut piffissaqanngitsoq, ataasinngormalli KNAPK-p aaqqissuussaanik akerliussutsimik takutitsisoqarmat oqaaseqarpoq.
Múte: Aaqqiissuteqartoqassasoq neriuutigaara
Múte B. Egedep oqaatigaa, Naalakkersuisut suliamut malinnaasut:
- Aalisartut piniartullu kattuffiata KNAPK-p aalisakkanillu tunisassiorfiup Royal Greenlandip isumaqatiginninniarnerat Naalakkersuisunit malinnaaffigineqarpoq.
- Naalakkersuisut taamaammat isumaqatiginninniarnerit nangeqqinneqarnissaannut isumalluarput, neriuutigalugulu pitsaanerpaamik aaqqiissutissarsisoqassasoq, nipisanniartarnermi Kalaallit Nunaanni ilaqutariippassuit qitiulluinnartumik isaatitsissutigisarmassuk.